Pliskova tan nomawi pathumna

Inrinni zana khelh zawh tak Aegon International hmeichhe singles-ah seeded pathumna Karolina Pliskova chuan Caroline Wozniacki 6-4, 6-4 a hnehin a champion a, kuminah nomawi pathum a lakna chiah a ni.

Czech nula hian nomawi chawi tur hian set pahnihah a khingpui service vawi khat ve ve a chhuhsak a, darkar khat leh a chanve chhungin hnehna a chang - nikum October thla hnua Wozniacki-i'n nomawi chawi leh a tumna kawng a dal sak.

World number 3 Pliskova hian world number 1 ni tawh Wozniacki hmaah hian vawi 10 ngawt aces a siam thei a, a khingpuiin break point vawi li a hmuh chu a pawtthla leh vek thei bawk - vawiin tlai aṭanga khelh ṭan tur Wimbledon-ah pawh rinkai a ni phak ang.

Kum 25-a upa Pliskova chuan, "Ka service kha ka tan chuan ralthuam ṭha ber a ni a, Wimbledon-ah pawh hetiang bawka ṭha hian khelh leh theih ka duh hle," tiin a sawi.