Messi a lawm lo

Barcelona-in Real Madrid lakah nomawi an thlauh a ni mai lo a, an elpui team-in champion an lawm laiin Osasuna lakah 2-1 in an tlawm. 

Osasuna tan hian Jose Arnaiz chuan rin loh takin goal hmahruai a khung a, Messi hian tun season La Liga-a a goal 23-na ni turin freekick hmangin a sut. Mahse, minute 77-naa a kiua Clement Lenglet-a nghawk avanga Osasuna striker Enric Gallego hnawhchhuah a ni chungin Barcelona zawkin goal an chhuah nawn a, Roberto Torres chuan hun pek belhah Osasuna tan chakna goal a khung. 

Barcelona khelh danah Messi a lawm thei lo a, na takin a ṭhiante a sawisel. Argentine striker chuan, "Hetianga a tawp khar hi kan inbeisei lo a, mahse hei hian kan kum hman dan dik tak a pholang a ni. "Team chak lo tak kan ni a, thahrui leh phurna tak tak nena hmachhawn kan nih chuan kan tlawm mai zel a ni. Point tam tak kan hloh a, hetiang tur a ni lo. Kan khel ṭha tluang thei hlawl lo a ni. 

"Keimahni kan inenfiah phawt a ngai a, player aṭanga bul ṭan a ngai. Chu chauh chu a ni lo - club pumpui hian inenfiah kan mamawh. Barcelona kan ni a, match tina chak tura beisei kan ni," a ti. Barcelona-in mualpho loa season khar turin Champions League an la beisei thei a, August 8 zanah last 16 second leg khel turin Napoli an mikhual ang - match hmasaah 1-1 in an inhnehtawk. 

Messi chuan, "Roma, Liverpool... engmah kan pek miau loh avangin kan fan-te pawhin dawhtheihna an tlachham ṭan. Champions League nomawi chawi kan duh a nih chuan thlak tur thil tam tak a awm a, tun ang reng chuan Napoli lakah pawh kan tlawm ang," tiin a sawi.