Champion-te zinga champion Germany

Germany chuan Pathianni zan khan St Petersburg, Russia-ah Copa America champion Chile chu 1-0 in an hneh a, FIFA Confederations Cup-ah an champion.

FIFA hnuaia khawmualpui champion-te inelnaah Joachim Low-a'n a player neih ṭhat ber a hruai lo a, chutichung chuan Die Mannschaft hian ngam loh an tawng lo. 2014 FIFA World Cup champion Germany tan hian Borussia Monchengladbach captain Lars Stindl chuan minute 20-naah final-a goal awmchhun a khung.

Tawnhriat ngah?
Germany-in 2014 FIFA World Cup an champion ṭuma player pawimawh goalkeeper Manuel Neuer, midfielder Mesut Ozil leh Toni Kroos, forward Thomas Muller te an hruai tel lo. Joachim Low-a'n final-ah meuh chuan tlarhnung tihphui nan tawnhriat ngah lo zinga tawnhriat nei ṭha Shkodran Mustafi chu inkhel bul a ṭantir a, Arsenal defender hian Chile an hmachhawn hmasak ṭumin a tihsual vangin goal an chhuah.

Kum 25 mi Mustafi hian semifinal-a inkhel bul ṭan zawk kum 20 chauha Bayer Leverkusen full back Benjamin Henrichs a thlak a, Low hian Mexico an hneh ṭum aṭangin player pakhat chauh a siksawi. Bayern Munich player Joshua Kimmich chu defence lai aṭangin mual sirah dah a ni a, Mustafi chu Matthias Ginter leh Antonio Rudiger te nen tlarhnungah an ding.

Chile coach Juan Antonio Pizzi erawhin Portugal hnehtu player-te chungah rinna a nghat nawn a, tlarhmaa awm chu Alexis Sanchez, Eduardo Vargas leh Arturo Vidal te an ni.

Puitling nge nge
Chile-in an intawn hmasak ṭum ang thoin inkhel an thunun nghal a, Germany tlarhnung an talbuai hle. La Roja hian ball an chan loh pawhin pressure an pe zel a, tawnhriat nei tlem German player-te final-ah ṭum danga an tih angin ball an inpe kual thei lo.

Minute 10 a ral tih chuan La Roja lamin 68% zet ball possession an nei a, goal khung theihna tur vawi thum nei hmain keeper Marc-Andre Ter Stergen chu Germany tan chhandamtu a ni a; Charles Aranguiz, Vidal, Vargas leh Sanchez te chu Die Mannschaft rum ṭhaihtu an ni.

Tihsual pawi bik
South American lam chu goal an khung theih loh vangin hrem an ni a, minute 20-naah defensive midfielder Marcelo Diaz chu result danglamna hlawk turin a chesual. Celta Vigo midfielder Diaz hian ball a khawih rei hret avangin Germany tana goal thum khung tawh Timo Werner-a'n a chhuhsak a, RB Leipzig striker hian mimal chawimawina lam ngaihtuah loin Lars Stindl tan pe lehin goal ruakah Gladbach captain hian a pet goal.

Goal khat luh hnuah Chile-in nawr chhunzawm mah se tlarhnung lamin inrintawkna an hloh avangin Germany lamin counter attack hmangin an vaw let ve tawh a, inkhel thununtu tia chhal theih an ni tawh bik lo. First half tawp hmain Chile defender Gonzalo Jara tihsual vangin Leon Goretzka-a'n goal khung theihna hun ṭha a nei a, Schalke midfielder hian a hmang ṭangkai lo.

An ṭang tluan
Germany-in group stage-ah match thum khelin goal li an chhuah a, semifinal-ah pawh tlarhnung pawp chhunzawmin clean sheet nei loin final an thleng.

Final-ah erawh tlarhnung an rem phui a, keeper Ter Stegen a che ṭha tel bawk. Barcelona keeper hian hun tawp hmain Sanchez-a freekick pet a dan sak a, inelnaah a vawi khat nan clean sheet neiin man of the match-a thlan a ni.

VAR hi...
Confederations Cup-ah hian video assistant referee (VAR) hman ṭan a ni a, match tawp thleng­in hei hian sawisel a hlawh. Chile defender Jara chuan chiang fahranin Germany forward Timo Werner a nghawk lui a, video replay hmanga ennawn a nih hnuah yellow card chauh pek a ni.

FIFA head referee Massimo Busacca chuan group stage-ah result thlak theihna tur thuthlukna vawi ruk siam a ni a, thil thleng lian tham vawi 29 siam a nih thu a sawi lang. Match 12-ah thutlukna vawi 35 an siam tihna a ni a, chutihrualin an thutlukna zawng zawngin lawm a hlawh lo. Semifinal leh final-ah pawh VAR fakna tur a awm chhunzawm lo a, ṭha zawka hman a nih theih nan an her danglam hret a la ṭul dawn a ni.

Germany an ṭha ber
Germany coach Joachim Low chuan, "Inkhelh hma khan Arturo Vidal chuan nomawi an chawi an nih chuan khawvela team ṭha ber an nih tur thu a sawi. Hnehna kan chan tak siah chuan khawvela team ṭha ber kan la ni chhunzawm a, player naupang nen kan nihna kan humhim thei a ni," tiin khawvela team ṭha ber an nih thu a sawi.

Nakkuma neih tur FIFA World Cup thlir zuiin Low chuan, "In lama awm kan player ṭha te, tuna kan player-te leh European U-21 Championship chawitute aṭangin player ṭha thlang khawm pawh ni ila, World Cup nomawi erawh kan champion nawn dawn tihna a ni lo. Rinkai zingah erawh kan tel dawn a, keini chuan hemi pressure hi kan dawl zo ang," tiin a sawi.

Chile coach Juan Antonio Pizzi chuan, "Game nalh tak kan khel a, theihtawp kan chhuah a, goal khung theihna chance pawh nei mah ila football-ah chuan hetiang a tawp khar hi a ngai ṭhin. Kan champion loh avangin hnual mah ila khawvel team ṭha ber kan elphak avangin kan lawm a, kan khelh dan pawh chhawm nun zel kan tum ang," tiin an vanduai thu a sawi.

Lawmman huitu Germany
Germany capain Julian Draxler chuan player ṭha ber chawimawina golden ball a dawng a, final-a chakna goal siam saktu Timo Werner chuan goal thum khungin top scorer a ni. Champion team Die Mannschaft hian FIFA Fair Play Award an dawng a, Chile keeper Claudio Bravo chuan golden glove a dawng thung.

Confederations Cup-ah hian Brazil-in nomawi vawi li an chawi tawh a, France-in vawi hnih nomawi chawi tawhin Germany bakah Argentina, Mexico leh Denmark te vawi khat ṭheuh an champion tawh bawk.
Golden Ball: Julian Draxler (Germany)

Draxler bakah Sebastian Rudy leh Joshua Kimmich te chu Germany match ngaa inlan thei vek an ni. Kum 23 mi Draxler hi team khaipa a ni a, goal nawr kawngah player pawimawh a ni. Germany boss Low chuan, "Ani hi nakin lawka team kaihhruaitu tur a ni a, Neuer, Khedira, Hummels leh Boateng te hnung dawltu tur a ni. Julian tan tun hi hun pawimawh a ni," tiin a fak.

Chile forward Alexis Sanchez-a'n silver ball a dawng a, Germany midfielder Leon Goretzka-a'n bronze ball a dawng thung.

Golden Boot : Timo Werner (Germany;
3 goals/2 assists)
Kum 21 mi Timo Werner hian season liam ta khan Bundesliga-ah RB Leipzig tan goal 21 khungin assists vawi riat a nei a, Germany goal khung khawl Miroslav Klose thlaktu tura beisei a ni.
Germany forward Lars Stindl leh midfielder Leon Goretzka te chuan goal thum ve ve an khung bawk a, amaherawhchu assist an neih loh avangin an pahnih hian silver ball pek ve ve an ni.
Golden Glove: Claudio Bravo (Chile)
Chile captain Bravo hian match hmasa pahnih inhliam vangin a inlan thei lo a, Manchester City goal­keeper hi a inlan hnuah team tichaktu a ni. Semifinal-a Portugal an hneh ṭumin Bravo hian penalty vawi thumah vawi thum a dang a, Chile final thlenpuitu a ni.
Fair Play Award: Germany
Germany hian match nga an khelhah yellow card vawi riat chiah an hmu a, foul vawi 66 an nei bawk. Die Mannschaft hian Germany tih inziak chu Russia rama football fans hnenah an sem a, German Football Association chuan an pawisa dawn US $10,000 chu football-a hma an sawn zel theih nan training-na tur hmanraw lei nan an hmang ang.

Champion kalkawng
GERMANY
Group Stage
Australia 2 - 3 Germany
AUS : Tom Rogic 41'; Tomi Juric 56'
GER : Lars Stindl 5'; Julian Draxler 44'(P); Leon Goretzka 48'
Germany 1 - 1 Chile
GER : Lars Stindl 41'
CHI : Alexis Sanchez 6'
Germany 3 - 1 Cameroon
GER : Kerem Demirbay 48';
Timo Werner 66’, 81’
CAM : Vincent Aboubakar 79'
Semifinal
Germany 4 - 1 Mexico
GER : Leon Goretzka 6', 8'; Timo Werner 59'; Amin Younes 90+1'
MEX : Marco Fabian 89'
Final
Germany 1 - 0 Chile
GER : Lars Stindl 20'