RG Stadium enkawl uluk dawn

Mizoram chief minister Lal Thanhawla'n Rajiv Gandhi Stadium chu dimdawi zawka enkawl a nih theihna tur leh, football hmasawnna tura a ṭangkai thei ang bera hman tura MFA enkawl tura a dah thu July 1, 2017-a RG Stadium-a FPAI XI leh MFA XI inkhelh ṭumin a puang.

CM thutluknaah hian MFA chu a lawm takzet a. An chunga chief minister-in rinna a nghah ngam ang ngeiin khelmual hi theihtawp chhuaha enkawl a, ṭangkai taka hmanga football-a result ṭha zawk neih ngei tumin MFA chuan hma a la dawn a ni.

Mizorama football thuneitu sang ber chuan RG Stadium hi official football match bakah chuan Mizoram state team, grassroots footballer leh football club-te training-na tur hmangin dimdawi taka enkawl a tum a, chief minister sawi anga Lammual kan chen chhiat tawh avangin pawl/school hrang hrangte'n anmahni intihhlimna atana an hman theiha pek chhuah a tum lo a; state level leh district level infiamna atana hauh bik an tum a ni.