German MotoGP roreltu Marquez
MotoGP world champion ni lai Marc Marquez chu a zawna a vawi nga nan German Grand Prix-ah pakhatna a ni a, rider championship-ah point 129 hmuin Maverick Vinales leh Andrea Dovizioso te hnungzuiin tun season-a a vawi khat nan table hmahruaitu a ni.
Pathianni tlai Sachsenring-a intlansiakah Repsol Honda rider Marquez-a'n minute 40 leh seconds 59.525 chhunga lap 30 tlan zoin tun season-a a vawi hnih nan hnehna a chang a, pahnihna Jonas Folger nen an inkarah second thum deuhthaw a awm.
King of the Sachsenring
GermanGP tlanna tlankawng Sachsenring hi 3.7km a thui a ni a, kawng kawi 13 awm zinga 10 zet chu vei zawnga kawi niin kawng ngil thui lai ber chu 700m a ni; tlankawng zau zawng hi 12m a ni thung.
Spanish rider Marquez hian he tlankawngah hian kum 2010 khan 125cc category-ah pakhatna dinhmun a luah a, Moto2 huangah kum 2011 leh 2012 khan hnehna chang lehin bike intlansiak inelna sang ber MotoGP bike a khalh hnuah he hmunah hian a zawnin vawi nga hnehna a chang tawh.
Tun season GermanGP-ah pawh ṭum dang ang bawkin kum 23 mi Marquez hian pole position aṭangin bul a ṭan a, kawng kawi hmasa ber aṭanga hmahruai zui nghalin kum sarih chhung ro a rel tawhna a 'lal ramah' amah elphak an awm lo.
Monster Tech 3 Yamaha rider Folge-a'n na tawkin Marquez a nawr ve reng a, lap thumna phei chu minute khat leh second 21.422 chhunga tlan thlengin a tlan ṭhat ber ṭum a tawng!
German tlangval Folge hian a hma aṭanga bul ṭan Danilo Petrucci, Dani Pedrosa leh Cal Crutchlow te tlan pelin MotoGP bikah podium a lawn vawi khatna a tawng a, khawtual rider zingah dawhsana lawn thei hmasa ber a ni.
Marquez a lawm
World champion vawi thum ni tawh Marquez chuan, "Ka tum ber chu point 25 hmuh a ni a, rim taka ka beih hnuah ka hlawhtling. Intlansiak kan neih hma chuan engmah sawi lawk theih a ni lo a, inelna tak kan ṭan hnuah erawh engkim kha ka tan duhthusam vek a ni," tiin a sawi.
Honda rider chuan sawi chhunzawmin, "Hayden a chetsual ka hriat khan MotoGP intlansiaka hnehna ka chan hmasak ber chu a tan ka hlan ang tiin ka intiam a, tun ṭuma ka chak hi a tan a ni e," tiin May 22-a thi ta Honda rider hlui Nicky Hayden tan a chak chu a hlan.
An intiat
Tun season MotoGP intlansiak vawi 18 awm tur zinga pakua an tlan tawh a, hmahruai fal awm thei loin champion tur rin thiam a la harsa hle. Tunah hian chawlh an nei zui dawn a, August 4 hian round 10 nan Czech Republic Grand Prix an tlan leh chauh ang.
Intlansiak hmasa pahnih Qatar leh Argentina GP-a hnehna changtu Maverick Vinales-a'n Assen-a intlansiak a tlan tluan theih loh hnuah Germany-ah palina a hauh ve leh ta - Yamaha rider hian point 124 hmuin rider championship-ah pahnihna a ni.
Tawnhriat nei ṭha Valentino Rossi-a'n point 108 hmu tawhin palina dinhmun a luah a, a chung chiahah point 123 nei tawh Andrea Dovizioso a awm thung. Pakhatna Marquez leh palina Rossi te inkarah point 15 chiah a awm, intlansiak pakhat lehah an dinhmun a la inthlak thleng thawk thei!
German MotoGP Result
# Rider Ram Team Time
1 Marc Marquez Spa Honda 40:59.525
2 Jonas Folger Ger Yamaha 41:02.835
3 Dani Pedrosa Spa Honda 41:11.071
4 Maverick Vinales Spa Yamaha 41:13.778
5 Valentino Rossi Ita Yamaha 41:14.505
6 Alvaro Bautista Spa Ducati 41:16.059
7 Aleix Espargaro Spa Aprilia 41:19.261
8 Andrea Dovizioso Ita Ducati 41:19.713
9 Johann Zarco Fra Yamaha 41:20.663
10 Cal Crutchlow GB Honda 41:23.735