MFA Super Cup 2017 ; MPL club BVT leh Ramhlun North chak

Lalbiakliana Memorial MFA Super Cup 2017-ah Bethlehem Vengthlang FC leh Ramhlun North FC ten an match hmasa berah hnehna an chang nghal. Team 32 zingah Mizoram Premier League club pahnih an inhlangkai a, Nilaini hian Aizawl FC leh Chanmari FC an inkhelh dawn avangin MPL club pakhat chuan first round an paltlang dawn lo.

Nimin Lammual inkhel hmasa berah season liam taa second division champion FC Venghnuai-in harsatna nei loin third division club Bungkawn FC chu 4-0 in an sawp. Inkhel pahnihnaah BVT-in coach Chawngthansanga hnuaia an match hmasa berah beisei an pha lo.

MPL5 finalist BVT hian Aizawl FC Academy U18 hmaah harsatna an tawk a, fitness nei ṭha zawk AFC U18 ten inkhel thunun mah se goal an khung theih loh avangin penalty shootout hmanga chang zawk zawn a ni. BVT keeper thar Lalruatpuia'n penalty hmasa ber a dang a, Bawngkawn tlangval Lalnuntluanga'n a club thar tana a khelh hmasak berah penalty shootout aṭangin chakna goal a khung.

Lammual inkhel hnuhnung berah second division club Durtlang FC-in AFC Academy U16 chu 1-0 in an hneh a, ni hmasa berah Aizawl FC hnuaia football inzir rawlthar rual team hnih an chak lo nghal. Last 32-ah FC Venghnuai hian Bethany FC, Bawngkawn an hmachhawn ang a, MPL club BVT hian Durtlang FC an hmachhawn thung ang.

RG Stadium-ah Aizawl FC Academy-in Citizen FC Zotlang 5-2 in an sawp a, an khingpui tur hi anmahni ai maha naupang MFA Grassroots an ni ang. Grassroots naupangte hian inelna liantham an hmachhawn hmasak berah New Serchhip FC 3-2 in an hneh thei a, hlawhtlinna duhawm tak a ni.

Nimin inkhel hnuhnung berah Ramhlun North FC-in Republic Vengthlang FC chu 12 - 0 zetin an sawp a, Lalliansanga chu tun inelnaa hattrick siam hmasa ber niin goal li a khung a, he inkhelah vek hian Lalrinfela'n goal thum a khung ve bawk. MPL club hian last 32-ah vawiina inkhel tur Durtlang club FC Ramthar leh Darlawn Zone hnuaia club Sunhluchhip GSA chak zawk an hmachhawn dawn a ni.

Nimin Inkhel Results
Group A - Lammual
FC Venghnuai 4 - 0 Bungkawn FC
FCV : Israel Ramhmachhuana 32'; Lalrinchhana 57'; Isaac Hmingthansanga 63'; V. Lalremruatfela 78'
BVT 0 - 0 AFC Academy U18
Penalty Shootout-ah BVT 5-3 in an chak
AFC Academy U16 0 - 1 Durtlang FC
DUR : MS Dawngliana 28'

Group E - RG Stadium
Citizen FC Zotlang 2 - 5 AFC Academy
CIT : R. Zohmingliana 50'; Lalbiakzuala Varte (OG) 81'
AFC : David Lalhlansanga 14', 22'; Lalhruaitluanga Pachuau 43'; K.Lalhmangaihkima 64'; Lalremtluanga 90+1' (OG)
New Serchhip 2 - 3 MFA Grassroots
MFA : Joseph Lalrinawma 23'; H.Zawnhmingthanga 29';
F.Lalnuntluanga 37' (P)
NSE : Johny Lalremruata 55';
Lalhlimawma 64'
Ramhlun N FC 12 - 0 Republic VT FC
RAM: Lalliansanga 36', 70', 82', 85'; Lalrinkima 45+1' (OG); Lalramzauva 46'; Rosangliana 52'; Lalrinfela 59', 87', 89'; Jessy Vanlalmuana 72', 80'