Confederations Cup pathumna Portugal

Pathianni zanana khelh zawh tak Confederations Cup-ah Portugal chu pathumna an ni. Euro 2016 champion hian pathumna zawnna inkhelah Mexico 2-1 in an hneh.

Spartak Stadium, Moscow-a inkhelah Portugal-in Andre Silva hmangin minute 17-na lekah hmahruaina hun ṭha nei mah se AC Milan striker thar hian a penalty pet chu goal-ah a chantir thei lo.

Goal lut loa chawlhlawk hman a nih hnuah Portugal defender Luis Neto-a'n minute 54-naah anmahni lama a tih luh palh avangin Mexico lamin hma an hruai a, hun tawp dawnah Portugal tan defender Pepe-a'n a sut hram.

Extra time khelh zui niin Miguel Layun-a'n hand ball avanga a penalty chawi chu midfielder Adrien Silva-a'n a pet a, Sporting Lisbon midfielder hian minute 104-naah chakna goal atan a khung. Minute 106-naah Nelson Semedo hnawhchhuah a nih hnuah Raul Jimenez chu red card pek ve leh a nih avangin team pahnih hian player 10 ni chungin hun tawp an hmang.

European champion Portugal hian Confederations Cup lak tumin an player neih ṭhat an thawhchhuah pui a, mahse semifinal-ah Chile chu penalty shootout hmangin an ngam lo.

Captain Cristiano Ronaldo chuan semifinal-a an chak loh hnu lawkah fa phir a neih thu a sawi a, hei vang hian Real Madrid forward hi Mexico nen an inhmachhawn hmain sqaud aṭanga a chhuah phal sak a ni a - Mexico a hmachhawn lo.