Wimbledon atan Federer a inpeih

Roger Federer chuan kuminah khel ṭha tluang rih viau mah se a elpui 'Big Four' tia sawi ṭhinte chu atan Wimbledon nomawi chawi a tumna kawnga dal thei tur an nih thu a sawi a, chutihrualin a zam loh thu leh a inpeih thu a sawi tel bawk.

Mipa tennis khawvelah Federer, Rafael Nadal, Novak Djokovic leh Andy Murray te hi 'Big Four' tia sawi ṭhin an ni a, anni hian kum 10 chuang zet chu mipa singles an thunun tawh - Grand Slam vawi thum champion tawh Stan Wawrinka awm ve bawk mah se midang nena khaikhin ve turin nomawi a chawi tam tawk lo.

Kum 35-a upa Federer chuan, "Andy hi a dam ṭha a nih chuan rinkai a ni a, Rafa hian duhthusama ṭhain clay court season a hmang. Novak pawh in Eastbourne-ah nomawi a chawi avangin an ṭhat lai vek a ni a, kum dang zawng aiin kumin Wimbledon chu a harsa dawn, nomawi chawi tur chuan khelh ṭhat bakah vanneih tel a ngai dawn hle a ni," tiin a sawi.

Swiss star hian Wimbledon nomawi vawi sarih a chawi tawh a, kuminah hian a champion leh a nih chuan Pete Sampras nen record inṭawm an neih chu a kalsan ang a, a tan Grand Slam nomawi 19-na a ni bawk dawn a ni.

Grand Slam vawi 18 champion tawh Federer hian kuminah Australian Open, Indian Wells leh Miami bakah Halle Open nomawi a chawi tawh. Wimbledon-ah hian seeded pathumna niin vawiin tlai dar 4:00 hian first round-ah kum 29 mi Alexandr Dolgopolov a hmachhawn ang.

Inkhel tur thlirlawkin Federer chuan, "Engtik lai mahin ka khingpuite lakah tlawm ka duh ngai lo a, hnehna chan tumin na takin ka nawr ṭhin. Tun ṭumah pawh hian ka khelh dan phung thlak ka tum lo a, grass court-a ka ṭhat dan berin ka khel leh ang," tiin attacking game khelh a tum thu a sawi chiang.

Djokovic a zam lo

Vawiin tlai vek hian Grand Slam vawi 12 champion tawh Djokovic-a'n a match hmasa berah Slovakia tlangval Martin Klizan a hmachhawn dawn thung a, coach lailawk Andre Agassi leh Mario Ancic te kaihhruaina hnuaiah Djokovic hian fiahna a hmachhawn dawn a ni.

Grand Slam dangah chuan world ranking zul zuiin seeding siam mai ṭhin a ni a, Wimbledon-ah erawh grass court-a an chet dan an en tel ṭhin. Tun ṭumah pawh world number 4 Djokovic hi seeded pahnihnaah an dah!

Kum 30 mi Djokovic chuan, "Eng inelna huangah pawh hnehna ka chang a nih chuan ka hlim ṭhin. A bik takin Wimbledon-ah hian ka hlawhtling leh a nih chuan ka ngai hlu hle ang. Beisei ka phak lo tih chu ka inhria, mahse tunah hian inrintawkna ka nei," tiin vawi thum a champion tawhna hmunah hlawhtlin nawn a tum.

Wimbledon hi

Khawvela tennis tournament upa ber Wimbledon hi a vawi 131-na a ni a, nimin tlai aṭang khan khelh ṭan niin July 16-ah final khelh tura ruahman a ni.

All England Lawn Tennis leh Croquet Club-ah khelh niin court hrang hrang 19-ah khelh a ni. Centre Court leh Number 1 Court te chu inkhel pawimawh bik atan leh player langsar khelh nana hman a ni.

Wimbledon hi fur laia khelh a nih avangin ruah surin a ti buai fo a, Centre Court bik chu a chung khuhna siam tawh a ni. Court dang hi ruah a sur laia chawlh a ngaih ṭhin avangin inkhelh hun hi siam danglam a nih fo bakah sawn pawh a awm hial ṭhin.