Pune City-in Eugene an duh

Indian Super League club Pune City chuan midfielder Eugeneson Lyngdoh leh goalkeeper Vishal Kaith chu season tharah an hnena khelh chhunzawm tir ngei tumin an dawr mek. ISL club-ten player drafting neih a nih hmain a hma season-a an player lo hman tawhte pathum an chelh thei a, Pune club hian Khasi midfielder Eugene leh Vishal-te chelh an tum ta a ni.

Lyngdoh hian Pune City tan contract a ziah ngei rin a ni a, Ma­harashtra club tan hian a khel dawn a nih chuan season thum chhung a zawnin ISL-ah he club tan hian a khel dawn tihna a ni. Pune City assistant coach Pradhyum Reddy hi Eugene hrechiangtu a ni a, Shillong Lajong coach a nihlaia lo enkawl tawh Bengaluru-ah assistant coach a lo ni tawh bawk.

MPL club Chanmari FC nena inthlunzawm Pune hian Vishal Kaith lakluh an tum a nih erawh chuan pawisa an thehchhuah ve nual a ngai dawn. Shillong Lajong goalkeeper hian Meghalaya club-ah season khat chhung atan contract a la nei a, Pune club hian lakluh an tum a nih chuan transfer fee an sen a ngai dawn a ni.

Bollywood actor lar Hrithik Roshan-a club hian season hmasaa an coach Antonio Habas chuan tun season-ah pawh a kaihhruai tur thu an lo tichiang tawh.