Mizoram Lockdown (inkharkhip) ni 118

English football legend Alan Shearer-a'n a career a ṭanna chu Southampton a ni a, Saints tan hian 1987-88 ah a season hmasa ber a hmang a, 1991-92 season thleng a khel. 

Saints tan hian league bikah match 118 khel nghalin goal 23-a khungsak a, inelna hrang hrangah match 158 khelin goal 43-a khung. Shearer hian Saints-a a season hnuhnung berah match 60 khelin goal 21 a khung.Kum 1992 khan Blackburn Rovers chuan a hunlaia British transfer record ni turin pound maktaduai 3.6-in an lei a, 1995-96 season thleng khelin match 171-ah goal 130-a khungsak!

Blackburn tan hian 1994-95 season-ah Premier League nomawi a chawi a, kum 1996-ah Newcastle United chu a hunlaia khawvel footballer manto ber ni turin pound maktaduai 15-in a zawm zui. Magpies tan hian 2005-06 season thleng khelin inelna hrang hrangah match 405-a inlan a, goal 206-a khungsak. Magpies-ah hian mimal angin hlawhtling viau mah se nomawi chawipui erawh a nei miah lo thung,. Kum 49 mi ni ve tawh Shearer hian Premier League Golden Boot vawi thum a dawng a, PFA Players' Player of the Year-ah vawi hnih thlan a ni bawk.