Lìrnghînga chhiatna laka invèn nan Riahbûk eng emaw zat sak a ni
July 17, Zirtawpni zan dar 10:05 khan magnitute 5.01-a náin Mizoram khawchhak lam, Champhai district-ah lìr a nghîng a, in leh leilung khî a awm nual. Lirnghing vanga mahni ina riak ngam lo mi tam tak an awm a, khaw eng emaw zatah riah lailâwkna tur bûk eng emaw zat an sa tawh.
Tuipuiràl khaw hrang hranga khawtlang hruaitute hnen aṭanga thu dawn danin, Zirtawpni zana lirnghing hian in tihchim leh luah tlak loh khawpa in tihchhiat a neih hriat a ni lo a, in khi erawh khaw tinah eng emaw zat a awm a ni. In khite chu a tlangpuiin RCC building a ni hlawm.
Khawbung YMA president T Laltlanfela chuan Vanglaini zawhna chhángin, Zirtawpni zana lìrnghing bikah in chhia a awm lo a, in khik belh erawh eng emaw zat a awm tih a sawi a, "Mahni ina riak ngam lo eng emaw zat an awm a, mahni ina riak ngam lote tan bûk 17 kan sa tawh a, DC aṭangin sakna tur hmanrua min pe dawn a, kan sak belh leh ang," a ti. A sawi danin, bûk pakhatah mi 10 vel an riak thei a, bûk 17-ah chuan mi 170 vel an riak thei tura ngaih a ni.
Farkawn khuaah pawh riah lailâwkna tur bûk 10 chuang YMA branch pathumin an sa tawh. YMA hruaitute zinga mi H Zaneihliana chuan, bûk sakna atan Champhai DC aṭangin silpauline an dawn thu sawiin, "Bûk 10 chuang kan sa tawh a, bûk pakhatah mi 20 vel an riak thei tura ngaih a ni," a ti a; July 17 zana lirnghingin thil tihchhiat lian tham a neih loh thu a sawi.
Dungtlang YMA president K Vanlalhmuaka chuan, July 17 zana lirnghingin an khuaah in eng emaw zat a tihkhîk belh thu sawiiin, "RCC in khi chat zingah sikulte leh police station building pawh a tel," a ti. Mahni ina riak ngam lote tana khawlaia riahbûk sak chu a ti hmasa ber páwl an nih thu sawiin, "DC aṭangin hmanrua kan dawng a, bûk panga kan sa tawh," a ti. An khaw rama Lianchhiari Lunglèn Tlánga lung tohlâwt chu lìrnghîng vangin a khik belh nia an hriat thu a sawi bawk.
Hetih lai hian, Chawngtui 'E' khaw dáia Ṭhasiama Se No Neihna tlang pawh nasa takin a khîk belh a, leilung khi huam chin pawh a zau sâwt hle nia thu dawn a ni. Ṭhasiama Se No Neihna tlang hi June 22, 2020 zing dar 4:10-a lirnghing magnitude 5.5-a náin a sawi ṭumin a khi ṭan tawh a ni.
Mizoram khawchhak lamah hian Zirtawpni zan dar 10:05-a lir a nghìn bakah, tlai dar 3:56-ah magnitude 4.2-a ná leh zan dar 10:35-ah magnitude 3.1-a náin a nghing bawka thu dawn a ni.