A vawi 40 nan GSW chak lo

7th February, 2020

Golden State Warriors ke chheh a phet laklawh a, an kal rem a fuh thei rih lo. Nimin zing khan GSW hi Brooklyn Nets lakah 129-88 ngawtin an chak lo; NBA regular season kal laiah vawi 40 zet an tlawmna a ni bawk!

Stephen Curry leh Klay Thompson te tel lohna team hian chak ni hmel an hmu ve thei lo, tun ṭumah pawh hian - point 17 neitu D'Angelo Russell bakah Jordan Poole (16 points) leh Eric Paschall (15) che ṭha ve deuh mah se awmzia a nei phak lo.

Steve Kerr-a naute hi season kal laiah vawi 12 chauh an la chak ve avangin Western Conference table-ah chuan a mawngphah luahtu an ni reng. Pathianni zing dar 7:00-ah LeBron James awmna leh hmahruaitu ni bawk Los Angeles Lakers nen an inhmachhawn leh ang.