MFA Super Cup first round-ah final rematch ; Aizawl FC Vs Chanmari FC
Tualchhung football club hlawhtling pahnih Aizawl FC leh Chanmari FC te chu vawiin chawhnu dar 1:00 hian Rajiv Gandhi Stadium, Aizawlah an inhmachhawn dawn. Hemi zawh hian Mizoram Police leh Lengpui FC te an inkhel dawn a, a hmuhnawm ve ve ang.
Season ṭanna atana hman MFA Super Cup chu July 3, Thawhṭanni khan khelh ṭan a ni a, team 63 inziak lutin Lammual leh RG Stadium-ah khelh chhoh mek a ni.
A hma mah mah
Mizoram football inelna sang ber MPL-a champion lai chu Chanmari FC an ni a, an khingpui tur Aizawl FC hi India rama inelna sang ber I League champion an ni. Hei chauh hi a ni lo a, season liam ta khan Mizo club lian pahnih hi MFA Super Cup final-ah inhmachhawnin AFC an chak.
Season liam taa an sulhnu thlirin first round-a intum tur niin an lang lo a, amaherawhchu MFA lamin dan thar siamin seeded an siam lo. Team ṭha leh chhia thliar hran an nih tak loah chuan vanduai an awm a ṭul a, Aizawl FC leh Chanmari FC aṭangin team pakhat zawk chu vawiin hian mangṭha a ṭul dawn tihna a ni.
6-2 Phuba?
Nikum MFA Super Cup Final-ah Aizawl FC-in B. Zoramthara goal hmangin Chanmari FC 1-0 in an hneh a, kum khat dawn a ral tawh avangin nomawi chawi leh tun inkarah thil thleng a tam tawh hle.
Aizawl FC hi India rama football inelna sang ber I League-ah an champion a, an hlawhtlinna chan hi chhuan tham tling mah se nikum December 2 zana thil thleng an la theihnghilh lo ang. Chanmari FC-in MPL5 semifinalist first leg-ah Aizawl FC hi 4-1 in an sawp a, hemi ṭuma coach Lalsangzuala Hmar chuan, "Kan khel ṭha a, amaherawhchu ka ṭawng sual ang em aw, 4-1 a inkhel a tawp kha chu ka ui a ni," tiin goal tam zawk khung theih an nih thu a sawi.
I League khel thei club tan chuan an chak loh dan hi mualphona a tling a, second leg-ah 2-1 a chak lo zuiin Chanmari FC-in 6-2 a chakin MPL final an lut. Aizawl FC hi tun ṭumah hian Rohmingthanga'n a enkawl dawn a, Lengpui tlangval hian semifinal first leg-ah an lamah a tih goal avangin phuba lak a duh lehzual ang.
Team dang daih
I League-a Aizawl FC champion puitu coach Khalid Jamil leh player-ten Mizo club an chhuahsan hlawm a, foreigner zingah captain Alfred Kemah Jaryan chu la cham bang awmchhun a ni.
Mizo club hian Khalid-a thlak nan AFC pro licence nei coach an melh mek a, hemi chhung chu Rohmingthanga'n a enkawl ang. I League club hian Mizo player ṭha an la kawl nual a, goalkeeper-ah pawh Lalawmpuia leh H. Lalremruata te an kawl a, Mizo keeper ṭha pahnih a nei tihna a ni.
AFC hian foreign defender an la lut vat a nih loh chuan tlarhnung lam hi chu an chak lohna lai niin a lang dawn a, midfield-ah erawh Alfred-a'n a ho dawn bakah East Bengal aṭanga David Lalrinmuana an neih let avangin an ngaihtuah awm loh. Goal nawr tur pawhin H. Lalmuankima, Lalruatfela Zote, Lalremsanga, Rochharzela leh William Lalnunfela te an neih avangin an ngaihtuahawm loh bawk.
Chanmari FC pawh ṭum dang zawng aiin an squad a chhah lo a, ṭha tawh sa chhuahtirin player beiseiawm rual an kawl khawm. MFA Super Cup bakah inelna dang hrim hrim hi kum bithliah inelna a nih loh avangin MPL champion lai hi talbuai thei dinhmunah an ding.
Chutihrualin Chanmari FC hi zuam awm tak erawh an ni lo. MPL-a tawnhriat nei ṭha Rochhingpuia, Vanlalbiaa Chhangte, Lalrosanga, C. Lalmuanawma, Joseph Lalnunpuia leh F. Lalmuanawma te an kawl a, naupang ṭha rual nen an inpawlh fuh chuan eng team pawh hneh thei an ni ang.
Eng nge an sawi?
Aizawl FC coach Rohmingthanga chuan, "Keini aiin inpuahchahna ṭan hmasa hret mah se kan fitness chu a inang tawk turah ka ngai a, kan danglamna tur chu tawnhriat kan neih ṭhat zawkna hi niin ka hria. Chanmari FC nena kan inkhelh hunah kan vanneih zawk ka ring a, kan chak ka ring," tiin Vanglaini a hrilh.
Chanmari FC board chairman John Lalpeka chuan, "Kan player-te hi kan ringtawk a, champion thei squad kan neihah ka ngai. Kan coach Pu Thlanga hi kan tan chuan coach ṭha ber a ni a, anni hnuaia kan champion ṭum kha kan game nalh ber ṭum a ni," tiin an chhiat ber ṭum nia thusawi awm chu a pawm lo.
John chuan sawi chhunzawmin, "Kan tum hmasa ber chu champion a ni a, pahnihna chu naupang ṭha chher a ni. Kan squad hi an la naupang deuha kan ngai a nih chuan foreigner hmangin kan thuam chak ang," tiin Vanglaini a hrilh.
Police fiahna
Mizoram Police-in season khat chhung first division an khelh hnuah MPL-ah an kir a, coach Ṭialthawnga hnuaia season thar atana inbuatsaih ṭha ber a ni.
Police hian an match hmasa berah third division kai thar Lengpui FC an hmachhawn dawn a, he team hi CYMA Football-a Lengpui team nen khan an danglam tam loh avangin MPL club tan fiahna ṭha tak a ni ang.
Ṭialthawnga team-ah hian Mizoram XI-a tel pha F. Lalrinpuia, Lalfakzuala leh Lalhmunmawia te an awm a, I League-a Aizawl FC champion puitu V. Lalṭanpuia an nei let leh tawh bakah Santosh Trophy-a Mizoram player pawimawh Lalsangbera, Lalramtharmawia leh Lalbiakhlua te an neih avangin chak zawk tura rinkai an ni.
Vawiin Inkhel Tur
Lammual
GROUP B - First Round
10:00 AM Zo Dreams FC Vs LKS Hnahlan FC
12:00 PM Zarkawt FC Vs Chhinga Veng FC
02:00 PM Chawnpui FC Vs Khatla South
RG Stadium
GROUP F - First Round
01:00 PM Aizawl FC Vs Chanmari FC
03:00 PM Lengpui FC Vs Mizoram Police FC
July 6, Ningani
Lammual
Group B - First Round
10:00 AM Raphael FC Vs FC Armed Veng South
Group C - First Round
12:00 PM Melriat FC Vs Ramhlun Venglai FC
02:00 PM Ramhlun North FC Jr Vs Sailam FC