Aston Villa defender thar Terry

Chelsea legend John Terry chuan Championship club Aston Villa a zawm ta. England captain hlui hian Villa Park-ah kum khat hun hmang turin contract a ziak a, Premier League-ah hlawh tam zawk nen sawmna hmu mah se Chelsea hmachhawn a duh loh avangin English second division club lam hi a zawm.

Birmingham City manager Harry Redknapp chuan Terry hi lakluh tuma an dawr ngei thu a lo sawi tawh a, mah se Chelsea tan match 717 khela Premier League nomawi panga chawitu player hian season hman zawh taka Championship-a 13-na dinhmun luahtu Villa lam pan hi a thlang ta zawk a ni.

Bung thar

Kum 1998-a Villa nen League Cup-a an inhmachhawn ṭuma Chelsea tana a match hmasa ber kheltu Terry chuan, "Chelsea hmachhawn tura ka inngaihtuah hian ka zuam hlawl lo a ni," tiin Premier League club a zawm loh chhan a sawi a, "Stamford Bridge-ah khan kum 22 ngawt hun ka hmang a, ka inchhuang hle. Mahse, tunah chuan ka nun leh career-ah bung thar ka kai ta," tiin chona thar a hmachhawn tur thu a sawi.

England tana match 78 khel thei defender chuan sawi chhunzawmin, "He hmunah hian ka rilru zawng zawng 100% in ka dah a, Premier League-a kan kir leh ngei theih nan theihtawp ka chhuah ang. Villa Park hi England-a stadium ṭha ber pawl a ni a, players ṭha tak tak kan kawl tih pawh ka hria. Inkhelh hlan ka nghakhlel tawh takzet a, he club hian Premier League-a awm a phu a ni," a ti.

Ngatinge Villa?

Antonio Conte-a'n Chelsea-ah Terry mamawh tawh lo mah se kum 36-a upa defender hian Premier League, Chinese Super League, United States leh Turkish club ṭha Galatasaray aṭangin sum tam tak hlawh tura sawmna a hmu. Mahse, Terry-a'n hlawh tlem zawk hlawh turin Villa pan a thlang a, hei hi manager Steve Bruce leh Aston Villa director of football Steve Round-te nen an inṭhian ṭhatna vang nia ngaih a ni.

Terry hian Villa hi Premier League a hruai thleng a nih chuan a bonus hmuh tur nen chawhrualin kar khatah £80,000 vel a lalut dawn a, Birmingham-in kar khata £100,000 hlawh tura an sawmna ai pawhin a tlem. Mahse, Round hi Steve McClaren-a'n England a enkawl lai khan Terry nen hian an inkawmngeih hman hle nia sawi a ni a, coach Steve Bruce hian Terry-te nen Portugal-ah chawlh an hmang ho thung.