Arsenal-ah Lacazette a lut?

Arsenal chuan an player man to ber ni turin Alexandre Lacazette lakluh an tum a, he thu i chhiar meuh chuan an lalut fel thei tawh bawk. Khawtlang media-te chuan Lyon striker man zat hi pound maktaduai 52 ni turin an tarlang.

Gunners hian tun nipui transfer chhungin Bosnia international defender Sead Kolasinac chu Bundesliga club Schalke aṭangin free transfer-in an lalut a, striker Lacazette an lalut a nih pawhin player langsar pahnih khat chu an la lakluh belh ngei a rinawm

Feet 5 leh inches 9-a sang striker Lacazette hi season hmasa lam pawhin Wenger-a'n a ngaihven tawh ṭhin, mahse a hlawhtling lo. Season tharah Champions League an khel phak dawn lo nachungin tun transfer-ah thapui thawh lehin a tum a hlawhtling dawn ta nia ngaih a ni. Amaherawhchu, Lacazette hian London club a zawm a nih chuan French forward Olivier Giroud chu Everton pan tura sawi a ni a, thutlukna ṭha ber a ni ang em tih hi ngaihtuah tham a tling.

Kum 26 mi Lacazette hi Lyon academy aṭanga inzir chhuak a ni a, club dang a la nei ngai lo. Lyon tan hian inelna hrang hrangah match 275 a khelh aṭangin goal 129 a khung. Season hmasa bik khan French Ligue 1-ah match 30 a khelh aṭangin goal 28 a khung - season khat chhunga goal a khung hnem ber ṭum a ni.

Arsenal-in French forward Lacazette hi an duh ber an nih ngai chuan club vannei tak an ni. A chhan chu nikum season tawp ruala thuthang lian ber chu Antoine Griezmann-a'n Manchester United a zawm dawn tih thu a ni a, Lacazette hi Atletico Madrid-ah Griezmann thlak tura sawi a ni bawk. Amaherawhchu La Liga club hi hrem an nih avangin FIFA lamin player lakluh an phalsak lo a, Griezmann-a'n Atletico chhuahsan a ngai ngam lo a, Lacazette pawhin a duhthlanna hmasa Atletico lam a pan thei lo. French forward Lacazette hian Gunners a zawm a nih chuan Champions League a khel dawn lo tihna a ni a, French manager Wenger-a hnuaiah Europa League a khel ang.

Arsenal manager Wenger-a ban duhtu an pun nasat avangin kum hnih daih conract ziak thar French manager tan player thar lakluh bakah a neih sa chelh chu hna hautak a ni mek.

Season hmasa inlena hrang hranga goal 30 khung thei Sanchez leh playmaker Mesut Ozil te contract neih lai hi kum khat daih bak a ni tawh lo a, contract an la ziah belh lo. Chile international hian Bayern Munich a pan dawn lo tih chiang tawh mah se league lama an elpui Manchester City chuan an ngaihven hle nia sawi a ni. Alexis hi a chhuak a nih chuan English football-a tawnhriat la nei lo Lacazette tan a hmunruak hnawh khat a huphurhawm ang.