Nadal leh Murray hlim niah Wawrinka a tla

Rafael Nadal leh Andy Murray te tan Wimbledon first round paltlang tura harsatna a awm loh laiin Stan Wawrinka erawh player hriat hlawh ni ngai lo Daniil Medvedev lakah a zinkawng a tawp nghal!

Thawhṭanni zan Court One-a inkhelah Grand Slam vawi thum champion tawh Waw­rinka hi seeded pawh chang phak lo Medvedev-a'n 6-4, 3-6, 6-4, 6-1 in a hneh. Kum 21 mi Medvedev hian Wimbledon a vawi khat khelhna a ni a, hei mai bakah Grand Slam match bikah hnehna a chan vawi khatna a ni.

Swiss star Stan hian Austra­lian Open, French Open leh US Open nomawi a chawi tawh a, Open Era bikah Grand Slam palia champion kim thei player parukna ni turin Wimbledon bak a mamawh tawh lo. Mahse, Roland Garros finalist hi kum dang ang bawkin grass court-ah a zuih ral leh ta a ni - Wimbledon-ah hian semifinal a la lut ngai lo.

Seeded pangana Wawrinka chuan, "Ka khupah hliam ka nei a, inkhelh laklawh laiin enkawl ka ngai hial. Nidang angin ka khel chhuak thei lo a ni. Chutihrualin ka khingpui kha player ṭha tak a ni a, hnehna chan phu zawk khawpin a khel ṭha a ni," a ti.

Nadal an dal lo

Duhthusama ṭhain clay court season a hmang zo chiah a, grass-ah pawh Nadal-a'n ṭha takin bul a ṭan. Court One-ah darkar khat leh minute 45 chhung lekin John Millman chu 6-1, 6-3, 6-2 in a sawp.

Kum 32 mi Nadal tan tennis a khelh hun chhunga match 850 hnehna a channa chiah a ni a, khawvela tennis tournament upa ber Wimbledon bikah vawi 50 a chakna chiah a ni bawk.

Spain tlangval Nadal hi season hmasa khan a ban rek na vangin French Open aṭangin a inhnukdawk a, Wimbledon a khel thei lo zui bawk. Kuminah erawh Paris-ah a vawi 10 nan nomawi a chawi a, kum hnih hnua a vawi khat nan grass court-ah inlan leh chauh mah se buaina a nei lo.

Grand Slam vawi 15 cham­pion tawh Nadal hian second round-ah chuan American world number 43 Donald Young a hmachawn ang, player langsar an chak chho zel a nih chuan semifinal-ah Murray nen an inhmachhawn thei dawn a ni.

Wimbledon vawi hnih champion tawh Nadal chuan, "Clay-ah ṭha taka ka khelh theih avangin inrintawkna ka nei sang a, chuvangin grass-ah pawh buaina ka nei lo. Season duhawm tak ka hman lai hi ka chhawm nun zel theih ka beisei," tiin a sawi.

Rinhlelhna karah

Andy Murray hi world number 1 a ni a, nomawi kawl mektu a ni bawk. Heti chung hian kuminah a result a ṭhat tawk loh vang leh hliam a neih avangin Wimbledon-ah hian rinkai ber erawh a ni lo!

Centre Court-ah rinhlelhna leh hlauhthawnna thinlung nen Britain mipuiin Murray inkhel an en a, kum 30 mi hian an ram mipui beiseina a ti thlawn lo. Darkar khat leh minute 44 chhunga winners vawi 29 vuain world number 134 Alexander Bublik lakah 6-1, 6-4, 6-2 in hnehna a chang.

Grand Slam vawi thum champion tawh Murray hian second round-ah chuan 3-6, 7-6 (5), 6-4, 6-4 a Joao Sousa hnehtu Dustin Brown a hmachhawn leh ang. German tlangval Brown hian kum 2015 khan Nadal a lo hnawhchhuah tawh avangin Murray tan fimkhur a ṭul dawn a ni.

Wimbledon nomawi pahnih nei tawh Murray chuan, "Tun hnaiah hian ka hriselna lamah hma ka sawn chho hle a, court chhungah khan harsatna nei loin ka inkhel thei. Ka service leh forehand pawh in hma a sawn a, first round atan chuan ka khel ṭha tawkah ka ngai," tiin a khelh dana a lungawi thu a sawi.

Kyrgios zinkawng a tawp

Rawlthar beisei awm zinga pakhat Nick Kyrgios chu khel bawr na vangin Pierre-Hugues Herbert nen set hnihna an khelh zawh hnuah a inhnukdawk a, he inelnaah hian a vawi khat nan first round-ah a zinkawng a tawp zui bawk.

Kum 22 mi Kyrgios hi tun ṭumah hian seeded 20-na a ni a, a khingpui French tlangval hi seeded pawh chang phak lo a ni. Mahse, set hnih an khelh zawh chinah pawh Australian star hi 6-3, 6-4 in a hnufual zawkah a ṭang.

Monte Carlo Masters leh Italian Open bakah Aegon Championship-ah te khan Kyrgios hi a hliam vang bawk hian a lo inhnukdawk tawh a, inelna ṭan hma hian a fitness level chu 65% ni mah se a inlan tur thu a sawi chiang - inelna takah erawh dam chiang lo chung chuan result ṭha a hmu ta lo a ni.

Inkhel Thlirna Tawi
Nadal Stats Millman
5 Aces 5
0 Double Faults 2
47/70 (67%) First Serve % In 45/79 (57%)
19/25 (76%) Net Points Won 5/14 (36%)
8/13 (62%) Break Points Won 2/4 (50%)
33 Winners 11
18 Unforced Errors 17
91 Total Points Won 58
6178.5 Distance Covered 6214.4