Everton an che na zel Michael Keane leh Ramirez an lalut

Premier League club Everton-in season tharah tih mai mai an tum lo tih an pholang zel - Thawhṭanni zan khan Burnley defender Michael Keane chu pound maktaduai 30 thlenga a man sang chho thei turin an lalut a, Malaga striker Sandro Ramirez chu pound maktaduai 5.2-a an lakluh thu an puang nghal bawk.

Merseyside club hian nipui transfer-ah player lakluh nan pound maktaduai 90 chuang an seng tawh a, a tawpna a la ni dawn lo - Swansea City midfielder Gylfi Sigurdsson leh Burnley striker Andre Gray te an la beisei cheu!

Koeman a hlim

Everton boss Ronald Koeman chuan, "Michael hi Everton-a lakluh kan duh em em player zinga mi a ni a, kan hnena a lo khel tur hian minti hlim takzet a ni. Keane kan rim tirh khan club dang nen inchuh a ngai dawn tih kan hria a, mahse he club hmachhawp leh thil tumin a rilru a hneh avangin kan hnen a rawn pan a ni," a ti.

Goodison Park-a kum nga cham tura contract ziaktu Keane chuan, "Season hman zawh takah khan Everton inkhel hi ka en nasa em em a, an khelh duh dan leh ka khelh dan a inmilin ka hria. Ka ngaihdan chuan he club hi ka tana ṭha ber chu a ni a, player ka nihna angin hma ka sawn zel theih ka beisei," tiin Everton-ah hmasawn beisei chunga a luh thu a sawi.

Keane hi kum 2015 khan Manchester United chuan Burn­ley hnenah hian pound makta­duai hnihin an hralh a, club pahnih inremnaah Burnley hian Keane an hralh leh a nih chuan a hralhna sum aṭanga 25% chu United kutah a lut ang tih a awm - Burnley defender hralhchhuah zarah United an hausak belh dawn.

Tu nge Sandro?

Everton-in Keane an lakluh thu an tihchian rualin inremna an lo siampui tawh Sandro an lakluh thu official-in an puang chhuak nghal bawk. Kum 21-a upa striker hian Goodison Park-ah kum li cham turin contract a ziak a, Malaga-a a buyout clause (leichhuah theihna)-ah pound maktaduai 5.2 chiah a awm avangin Everton-in tlawm takin an lei theih phah.

Barcelona academy hming­thang La Masia chhuak a ni a, Catalan club B team tan match 61 khelin goal 15 a khung sak. Kum 2014-ah senior team-ah hlankai ni mah se star player rual awmkhawmnaah hmun a chang phak meuh lo a, kum hnih a khelh chhungin match 32 a inlanah goal sarih a khung.

Season hmasa ṭan dawnah Malaga-in Sandro hi an lalut a, kum thum chhung atan contract an ziahpui. Inelna hrang hrangah match 31 khelin goal 16 a khung sak a, La Liga-ah striker 'hot' ber pawl a ni phak - tunah chuan Everton player a ni ta.

Sum seng hnem

Everton-in transfer bazar-ah player panga an lalut tawh a, sum an seng huai hle. England Under 21 goalkeeper Jordan Pickford chu pound maktaduai 30 thlenga a man sang chho thei turin Sunderland aṭangin an lalut tawh a, football khawvel an barakhaih.

Merseyside club hian Pick­ford an lakluh hnu lawkah pawi­sa an nei tih pholangin Ajax captain Davy Klaassen an lalut lehnghal a, Dutch midfielder man zatah hian pound maktaduai 23.6 an inseng. Henry Onyekuru chu KAS Eupen aṭangin pound maktaduai sarihin an lalut a, Nigeria striker hi Anderlecht-ah kum khat chhung loan-a khelhtir turin an chhuahtir thung.

Everton-in Michael Keane leh Sandro an lalut leh ta a, player dang an la melh nual bawk avangin season tharah Champions League khelh an tum ngam a nih pawhin a mak lo ang.