Indian Super League Engtin nge ni zel dawn?

Thla thum chhung khelh ṭhin Indian Super League chu tun season aṭangin thla nga chhung khelh tur a ni dawn a, November aṭanga March thleng khelh tura ruahmanna siam niin team pariat inel ṭhin kha 10-ah tihsan a ni bawk. Bengaluru FC leh Tata Steels enkawl tur club-te chu ISL club thar an ni ang.

Indian Super League-in kalphung thar a hman tur thu sawi a nih rualin ISL season hmasa bera player draft chu kalpui leh tura ruahmanna siam a ni a, hei hian sawi zui a hlawh hle.

Chelh theih zat

ISL club ten season hmasaa an player neihsa aṭangin senior player pahnih leh Under 21 player pathum bak an kawl chhunzawm thei lo. Mahse, U21 player an kawl chhunzawm zingah ram tana inlan tawh an awm chuan senior player anga chhiar tur an ni a, hei hian draft an hmachhawn hunah nghawng a nei ang.

Entirnan Delhi Dynamos chuan senior player pahnih bakah U21 player pathum an chelh a, draft hi third round aṭangin an chhim thei ang. Mahse, senior player pahnih baka U21 player pathum an chelh zingah ram tana inlan tawh an awm chuan draft neih a nih hunah fourth round

aṭang chiahin an ṭan thei ang. Hei hian players lak kawngah nghawng a nei dawn tihna a ni.

Engtin maw?

Club-te hian players an chelh panga-te chu ISL hotute hnenah an thlen ang a, July 7 thleng an players neihsa chelhna hun an nei ang. Players an chelh reng reng hi contract rei zawk ziahpui theih an ni. Bengaluru FC chuan season thar atan player an chelh duh an tichiang tawh a, Sunil Chhetri leh Udanta Singh chu kum thum chhung atan contract an ziahpui.

Atletico de Kolkata-in con­tract an ziahpui Debjit Majum­der leh Mumbai City keeper Am­rinder Singh-te pawh hi season hmasaah khan an club awmnaah hian an lo khelh tawh avangin player 'chelh' angin contract an ziah theih phah. Bengaluru FC player nghet CK Vineeth hi South Indian club-in an chelh loh avangin season hmasaa loan-a a khelhna Kerala Blasters chuan an player angin an chelh thei ang.

Player draft?

Indian Super League season hmasa berah khan draft hmang hian players lilam an lo ni tawh. Hemi awmzia chu club nei loa awm mek player-te chu draft-ah hian lilam theih tura dah an ni dawn a, club tin chu player 'chhan' theih hun siamsak an ni ang a, a chhang huai apiangin player an chang ang.

Player-te hian an man inṭanna zat an nei ṭheuh dawn. Entirnan Mizo tlangval Jeje Lalpekhlua hi Chennaiyin FC-in lo chelh lo ta se, draft-ah chhan theih tura chhawpchhuah a ni ang. Indian football-a a record ngaihtuahin a man hi nuai 50-ah inṭan ta se, a chhang huai ber club-in Jeje hi an chang mai dawn a ni.

Players neih zat

Indian Super League-ah player 25 aia tam squad-ah neih theih a ni dawn lo. Foreign player pasarih aia tlem neih a thiang lo a, Indian player kawl zat pawh 15 aia a hniam a thiang lo. Foreign player neih theih zat hi pariat aia tam a theih lo thung.

Club tinin players hlawh zatah vaibelchhe 18 aia tam an seng thiang lo a, ram pawn player hlawhah vaibelchhe 12.5 aia tam sen loh tur a ni. Tun season ISL-ah marquee player neih ngei ngai ṭhin chu tihtawp a ni a, mahse club-in marquee player hi lakluh ṭalh an la duh a nih chuan a hlawh hi player hlawh atana bithliah sa huam chhungah a tel ve lo ang.