Hmeichhe player langsar an chak

Thawhṭanni tlai aṭangin Wim­ble­don khelh ṭan a ni a, hmeichhe singles-ah player langsar - Petra Kvitova, Simona Halep, Victoria Aza­renka, Venus Williams leh Johan­na Konta ten hnehna an chang vek.

Centre Court-a inkhelah vawi hnih champion tawh Kvitova chuan Johanna Larsson 6-3, 6-4 in a hneh. Seeded 11-na Kvitova hian hnehna chang turin set pahnihah vawi khat ve ve a khingpui service a chhuhsak.

Nikum December thla khan Czech Republic-a a chenna inah Kvitova hi chemte hmanga beih niin tennis a khelh thiamna a ban vei lam a hliam. A ban zai a nih hnuah tun ṭum hi tournament a khelh leh hmasak pathumna chiah a ni.

Inkhel dangah Halep chuan darkar khat leh minute 13 chhungin New Zealand nula Marina Erakovic chu 6-4 6-1 in a hneh. Seeded pahnihna Halep hian kum 2014 khan he hmunah hian final a khel tawh.

Romanian star Halep hian Grand Slam hnuhnung ber French Open final a lut a, mahse Roald Garros-ah hian a vawi hnih nan final-ah a chak lo. Tun ṭumah hian a major title hmasa ber lak tumin bul a ṭan fuh hle.

Inkhel dangah kum 37 mi Williams chuan Court One-ah kum 21 chauha upa Elise Mertens chu 7-6 (9-7), 6-4 a hnehin second round a inhlangkai. American star hian Wimbledon nomawi vaiw nga a chawi tawh a, senior deuh tawh mah se kuminah hian rinkai zingah a la tel phak.

Khawtual nula zinga ranking sar ber Johanna Konta pawhin first round paltlang turin harsatna a tawk lo. Seeded parukna Konta hian French Open-a a hneh loh Hsieh Su-Wei chu 6-2, 6-2 in a hneh.

Kum 26 mi Konta hian darkar khat chuang deuh lekah Chinese Taipei nula serive hi ṭum nga ngawt a chhuhsak thei a, grass court-ah nomawi chawi beiseina a nei mek zel.