East Bengal tan Plaza a rinawm
Kolkata club lian East Bengal chuan season hman zawh taka I League-a an lo chhawr tawh striker Willis Plaza chu season tharah pawh chhawr chhunzawm zel turin contract thar an ziahpui. Trinidadian striker hian I League khelh zawh takah khan Red and Golds tan hian match 14 khelin goal kua a khung thei a ni.
East Bengal hian I League-a Aizawl FC champion puitu Khalid Jamil chu I League-a Indian coach awm tawh zinga hlawh hnem ber ni turin contract an lo ziahpui tawh a, Mizo club aṭang hian Mahmoud Al Amna, Lalramchullova leh Brandon Vanlalremdika an lo lalut tawh bawk.
Red and Golds hian I League khelh hmain Calcutta Football League-ah an hmel an lan phawt dawn a, India rama league ngaihhlut hlawh ber pawlah hian champion lai niin Khalid-a kaihhruaina hnuaiah an nomawi humhim an beisei ang.