Intlansiak pathum an ṭhulh

June leh July thla bawr vela tlan tur - German, Dutch leh Finnish MotoGP te chu Covid-19 vangin kuminah neih theih a ni dawn lo, season thar hman ṭan hun tur hi tun thlengin tih chian theih a la ni lo bawk.

MotoGP thuneitu lam chuan July thla tawp lamah bike intlansiak hi neih ṭan theih an la beisei, mahse hri leng vangin engmah chiang a awm thei lo. August 9-a tlan tur Czech Grand Prix chu calendar pangngai awm sa anga an tlan theih hmasak ber tur nia lang a ni.

MotoGP nena inremna nei, intlansiak buatsaihtu Dorna Sports chief executive Carmelo Ezpeleta chuan, "Germa GP hian hlutna bik a nei a, KymiRing tlankawng thar pawh hmuh hlan kan nghakhlel, mahse a rem si lo. TT Circuit Assen kan hmu thei lo tur hi a pawi," tiin intlansiak pathum an ṭhulh thu a sawi.

A tira ruahman dan chuan German Grand Prix hi June 21-a tlan tur a ni a, June 28 hian Assen tlan kawngah Dutch GP an tlan zui ang; KymiRing tlan kawngah 1982 hnua a vawi khat nan Thailand Grand Prix chu June 28-a tlan tura tih a ni bawk.

Mahse, intlansiak pathum hi an tlan thei dawn lo, a hma lamin Qatar Grand Prix chu ṭhulh a lo ni tawh bawk. Intlansiak tur pali ṭhulh a ni ta a, pali dang chu a hun sawn a ni - a dang 12 chu a hun pangngaia neih theih beisei a la ni thung.

Coronavirus hian season tir lama intlansiak tur pariat ngawt mai a tibuai ta a, tun dinhmunah hri leng hian ziaawm lam a la pan hleih theih loh avangin a dang a nghawng buai chhunzawm a nih pawhin a mak 

lo ang.

Bike intlansiakna sang ber MotoGP hi kum 1949 aṭanga neih ṭan tawh kha a ni, ram hrang hrangah an tlan kual ṭhin. Ram ṭhenkhatah hun rei vak lo an tlan a, season tin deuhthaw an tlanna ram hi danglam a awm ve reng ṭhin.

DutchGP hi inelna an neih tirh khan a tel nghal a, tun thlengin anni chiah hi chawl loa kum tin MotoGP thleng ziah thei awmchhun an ni. Kuminah erawh hripui leng vangin an tlan thei dawn ta lo, sulhnu duhawm hi hri vangin a tawp!