I League champion-in MPL champion hneh
Aizawl FC-in I League an champion hnua an match hmasa berah MPL champion Chanmari FC chu Lalbiakliana Memorial MFA Super Cup 2017-a an match hmasa berah an hneh. Nimin RG Stadium-a inkhel dangah Mizoram Police-in Lengpui FC chu 10-0 in an sawp bawk.
Beisei pha lo
MFA Super Cup final rematch-ah Aizawl FC hi an captain hlui David Lalrinmuana hoin an inlan a, I League-a best midfielder Alfred Kemah Jaryan khel bawk mah se an khingpui Chanmari FC ang thoin game nung tak an khel chhuak thei lo.
Chanmari FC-in minute 90 chhungin ball an chang tam zawk a, goal chance pawh an ngah zawk a, chutichung chuan keeper Lalawmpuia tan hna an siam lo. An khelh dan thlirin hun pangngaia goal a lut lo hi a mak lo.
Penalty Shootout-ah Chanmari FC keeper Lalmuanawma'n a zawnin vawi hnih a dang nghal a, amaherawhchu Aizawl FC keeper AwP-a'n penalty hnuhnung vawi thum a dang vek. AFC tana pet hnuhnung ber H. Lalmuankima'n cool takin goal laiah a pet a, pressure sanga 'panenka kick' ngata a pet ngam hi a hmuhnawm danglam hle.
East Bengal aṭanga Aizawl FC-a rawn kir David-a chuan, "Season liam ta ka khel tlem a, physical fitness leh match fitness nei turin hun ka la mamawh a ni," tiin Vanglaini a hrilh a, MPL-ah chuan a hmuhnawm hman tura ngaih a ni. Chanmari FC coach H. Vanlalthlanga pawhin, "Hun pawimawhah concentration kan pe lo a, ka lawm lo khawp mai. MPL-ah chuan tun hmaa kan hmuh ṭhin Chanmari FC ang kha kan hmu leh tawh ang," tiin a sawi.
Aizawl FC an elpui Chanmari FC lakah an chungnun belh zel a, vawi 23 an inhmachhawn tawh aṭangin vawi 13 an chak a, vawi khat an inhnehtawk.
Police an lian
MFA Super Cup atana inpuahchah ṭha ber Mizoram Police-in an match hmasa berah an thawhrah an seng a, Lengpui FC lakah goal 10 an khung theih avangin champion rinkai zingah chhiar tel theih an ni. MPL kai thar Police leh Aizawl FC ten last 16 an thleng a nih chuan an inhmachhawn thei dawn a, inkhel hmuhnawm a ni ang.
Police tan Lalbiakhlua'n goal li a khung a, Biaktea hian Santosh Trophy final round leh CYMA Football-ah goal hmaah hlah ho thei mah se Lengpui FC lakah erawh tun hmaa kan hmuh ṭhin bawk kha a ni. Armed Veng tlangval Lalfakzuala chu tlarhmaah awmin hattrick a siam ve bawk a, Lalsangbera leh Vanlalhriata ten goal khat ve ve an khung bakah Lalbiakmawia'n goal khat a khung ve bawk.
Lengpui FC-in goal 10 chhuah mah se inkhel ṭantirh lamah Police an tibuai pha a, penalty hlah lo se chuan result mawi hnai zawk nei thei tur an ni.
Nimin Inkhel Results
Lammual
GROUP B - First Round
Zo Dreams FC 1 - 1 LKS Hnahlan FC
ZOD : Remsangpuia 56'
LKS : Lalliandinga 81'
Penalty Shootout-ah Zo-dreams 4-2 in an chak
Zarkawt FC 0 - 9 Chhinga Veng FC
CHH : Malsawmfela 6' (P), 58'; Ramfangzauva 16'; Lalrammuanpuia 32', 41'; Laldampuia 65', 66'; MS Dawngliana 79'; Lalchhuanpuia 87'
Chawnpui FC 1 - 0 Khatla South
CHA : Malsawmzuala 80'
RG Stadium
GROUP F - First Round
Aizawl FC 0 - 0 Chanmari FC
Penalty Shootout-ah Aizawl FC 3-2 in an chak
Lengpui FC 0 - 10 Mizoram Police FC
MIZ: Lalbiakhlua 16', 17', 64', 81'; Lalfakzuala 33', 38', 39'; Lalbiakmawia 54' (OG); Lalsangbera 86' Vanlalhriata 87'