India-in league pahnih nei dawn
Nimin khan All India Football Federation hnuaia League Committee chu an ṭhukhawm a, an thurel langsar tak zingah tun season atana I League leh ISL a ruala kaltir an remti. League pahnih hi India rama league sang ber an ni ang a, October-a FIFA U17 World Cup khelh zawh lamah khelh tura ruahmanna siam a ni.
Vanglaini thu dawn danin I League leh ISL hi November thla tawp lamah khelh hman beisei a ni a, March-ah league pahnih hi khelh zawh a ni ang. League pahniha a sang pali ve ve te inel lehna tura ruahmanna siam sa Super Cup/Champions Cup chungchangah erawh thutlukna siam a ni lo a, SAFF Championship 2018 Bangladesh-a neih tur ngaihven phawtin ISL enkawltu Football Sports Development Limited (FSDL) nen inrawn leha thutlukna siam turin an dah.
Football House, New Delhi-a ṭhutkhawmah hian I League hmasawnna turin Task Force din rel a ni a, hetah hian League Committee chairman leh vice chairman, FSDL aiawh, AIFF general secretary leh I-League CEO te chu tel tura tih an ni. Mizoram Football Association honorary secretary Lalnghinglova Hmar chu League Committee vice chairman a nihna angin task force-ah hian a tel dawn tihna a ni.
Hetihlai hian FSDL chuan I League chu Star Sports-ah quality ṭha zawka pek chhuah a nih tawh tur thu an sawi a, I League club-te chu zin veivahna club tin nuai 50 ṭheuh pek tur leh special subsidy nuai 20 ṭheuh pek turin an rel bawk.