Chhinga Vengin goal 9 nen bul an ṭan

Nimin khan Lammualah tualchhung transfer-a thawm nei lian ber Chhinga Veng FC an inlan ṭan a, Zarkawt FC chu 9-0 in an sawp.

Lalbiakliana Memorial MFA Super Cup 2017-ah Chhinga Vengin coach Lalsangzuala Hmar hnuaia an game hmasa ber an khel a, coach ṭha hnuaia player ṭha rual awmkhawm hi second division club tan chelh rual an ni lo.

Season liam ta MPL best player Malsawmfela'n minute rukna lekah a club thar Chhinga Veng tan goal a khung a, Ramhlun South tlangval hian second half-ah goal khat dang a khung leh bawk. MPL5 top scorer Laldampuia pawhin a club thar tan goal hnih a khung a, season liam taa MPL-a Bethlehem VT top scorer Lalrammuanpuia'n goal hnih a khung bawk.

MPL-a Chanmari FC champion puitu Ramfangzauva'n goal nen club thar tan bul a ṭan a, Bawngkawn tlangval MS Dawngliana'n a piancham phakah goal khat a khung a, Ramhlun North FC aṭanga Chhinga Veng zawmtu Lalchhuanpuia'n goal khat a khung ve bawk.

Chhinga Veng hian starting eleven zingah season liam taa an player zingah Lalthlamuana chiah an chhawr a, tlarhnunga inkawp Lalrinchhana leh Lalawmpuia te chu Chanmari FC leh Chanmari West FC aṭanga an lakluh an ni a, 1st Bn MAP Academy vanglaia inkawp ṭhin a ni.

Aizawl FC aṭanga Chhinga Veng zawmtu Zothanmawia'n goal a chhuah lo a, midfield-ah Chanmari FC aṭanga an lakluh midfielder R. Malsawmtluanga leh Lalrinchhana te an inkawp bawk a, wing-ah Bethlehem Vengthlang FC chakna hnar ni ṭhin Laldingngheta an la nei bawk. Chhinga Veng FC hi tualchhung football-ah chuan All-Star Team tih hiala sawi theih an ni.

Lammual inkhel dangah Zo Dreams FC-in hun pangngaia LKS Hnahlan FC chu 1-1 a an draw hnuin 4-2 in penalty shootout-ah an hneh a, Chawnpui FC-in Malsawmzuala goal hmangin Khatla South 1-0 in an hneh bawk.