Wayne Rooney a kir dawn?

England captain Wayne Rooney chu Man­chester United aṭangin a chawr chhuahna Everton-ah a kir leh mai thei.

Man United mana­ger Jose Mourinho enkawlna hnuaiah kum 31 mi Rooney hian Old Trafford-ah hmun pawimawh a chang phak lo. Season hmasa khan Premier League match 15-ah chiah inkhel bul a ṭan ve a ni.

May thla khan Rooney hian, "United-ah kum 13 ka cham tawh a, he hmuna cham zel ka duh. Mahse, football khelh ka duh a ni," tiin a lo sawi tawh. Rooney hian United a chhuahsan a nih pawhin Premier League club zingah Everton lo chu a pan loh tur thu a sawi tawh bawk.

Tun nipui transfer-a che na tak Everton hian Goodison Park lam­ah Rooney hi seng luh leh an hreh lo nia sawi a ni a, United lam hian Real Madrid aṭangin striker Alvaro Morata lakluh an tum thung.

Rooney hian Mer­seyside club aṭangin kum 2004 August thla khan pound maktaduai 27-in Man United a zawm a, United tan hian goal 253 khung tawhin ani aia khung hnem an awm lo.