Engmah an hre si lo–Mbappe

Paris Saint-Germain forward Kylian Mbappe chuan mi hrang hrangin a hma hun sawisak ṭhin mah se, tumahin an hriat chian loh thu a sawi.

France international hi Real Madrid nen sawizawm a hlawh, Spanish club lian manager Zinedine Zidane pawhin Mbappe a duh thu a zep lo. Hun remchang nei ni sela chuan Santiago Bernabeu-ah a seng lut duh ngei ang tih a chiang.

Kum 21 mi Mbappe chuan, "An sawi nasa, mahse an hre si lo," tiin twitter-ah a pholang a, Ligue 1 champion PSG tana a khelhpuite a ngaih tawh thu a tarlang tel bawk.

Rawlthar duhawm Mbappe hian tun season Ligue 1 bikah goal 18 a khung a, inelna hrang hranga a khung belhkhawm chu goal 30 a tling der tawh, season hmang tluan ni se la chuan a khung belh nual 

ngeiin a rinawm.

AC Monaco tana league nomawi a chawi hnuah PSG a pan a, Paris club tan hian league nomawi pahnih bakah, French Cup, League Cup leh Super Cup a chawi leh vek tawh.