WBO hnenah Pacquiao-a zualko

Weight division pariata champion ni thei Manny Pacquiao chuan tun hnaia sawisel hlawh tak hmanga Jeff Horn a hneh loh chung­changah Australian boxer nena an inhnek chu thlirletna nei leh turin World Boxing Organization hnenah ngenna a thlen.

Brisbane khawpuia inhnekah khawvelah ngaihin Pacman chak mah se judge pathum ten khawtual tlangval Horn hi chak zawkah an puang a, khawvelin a sawisel. He inhnek result sawiseltu zingah world heavyweight champion Lennox Lewis hial pawh a tel a, British boxer hian judge-te nen an inhnek thlir chu a in ang lo a ni ang, ti hialin a sawi chhuak.

Pacquiao chuan, "Boxing hi ka hmangaih em em a, he infiamna ka ngainat em em hi mitute emaw tih dik loh avanga mipui thinlunga a thi tur hi ka phal lo a ni," tiin an inhnek result avanga mi tam takin boxing infiamna chungchangah ngaihdan an neih phah thu a sawi.

Philippines Games and Amusement Board chuan Pacman-te inhneka thutlukna leh refereeing chungchang chu ennawn turin WBO hnenah an thlen ve bawk a, boxing zahawmna chu humhim a ṭul thu an sawi tel. Pacman pawhin WBO hnena a thu thlenah hian he lehkhaa thute hi a tarlang tel.

Kum 38-a upa boxer chuan, "Thutlukna siam tawh chu ka lo pawm thlap tawh a, mahse hruaitu ka nihna leh, fighter ka nihna angin mipuiin he infiamna hi dik tak leh ṭha taka an hmuh reng theih nan tih tur ka nei si a ni. WBO hian Philippines Games and Amusement Board lehkha hi mipuiin boxing an hawisan mai loh nan uluk takin lo thlir se ka duh a ni," a ti. Pacman hi Philippines-ah hian senator a ni bawk.

WBO hian Pacman lehkha an dawn hma, Thawhlehni khan twitter lamah Pacquiao leh Horn inhnek chungchanga sawiselna tam avangin thuchhuah an lo siam tawh a, result chu inthamna emaw dan bawhchhiatna thil a awm a nih loh chuan tihdanglam a nih loh tur thu an sawi.