Lungleiah Charity Match an khel dawn

Vawiinah hian Ṭhuamluaia Mual, Lungleiah Mizoram Professional Footballer Association XI leh Lunglei XI ten charity match an khel ang a, heta ṭanga an sum hmuh hi tun hnaia chhiat tawk ṭanpui nan an hmang ang.

Charity match hma hian concert a awm ang a, tlai dar 1:00 aṭangin Mizo zaithiam lar an inlan ṭan ang. Inkhel hi chawhnu dar 2:30-ah khelh ṭan tur a ni a, MPFA XI-ah hian India striker Jeje Lalpekhlua leh Lunglei chhuanvawr Lalrindika Ralte te an inlan dawn avangin inkhel hian ngaihven a hlawh ang.

MPFA XI-ah hian Jeje leh Didika bakah Lalthuammawia Ralte, Zohming­liana Ralte, Lalrozama Ralte, Sena Ralte, Lalramchullova, David Biakzara, Malsawmzuala, Isaac Vanmalsawma, Samuel Lalmuanpuia, R. Laldanmawia, Robert Lalthlamuana, Sena Fanai, Lalchhanhima (Tetepuia), Malsawmkima, Lalnunpuia (Bawihpuia) leh Lalrempuia te an inlan dawn - mimal tin hi en châkawm vek an ni.

MPFA XI president S. Malsawm­tluanga chu Kolkata lama a chhuk thlak tawh avangin a inlan ve thei dawn lo a, amaherawhchu FPAI XI hmachhawn zinga tel lo Neroca winger Biakzara, Fateh Hyderabad defender Rozama leh midfielder Sawmkima, East Bengal defender Robert leh forward Tetepuia, AFC forward Bawihpuia leh Minerva Punjab midfielder Rempuia te an inlan theih dawn avangin Lunglei mipui tan chuan hmaih phal chi a ni lo ang.

Mizoram Professional Footballer Association hian kum 2010 khan Mamit leh Ngopa hnehah ṭanpuina an pe tawh a, 2012 khan Cancer Institute pualin charity match an khel tawh a, kum 2013-ah Laipuitlang chhiatna thleng vangin ṭanpuina an pe leh bawk. MPFA secretary Didika chuan, "Mi harsate leh chhiat tawkte tana che chhuak thei kan awm hi kan vanneiin kan hria a, ṭanpui ngaite ṭanpui theia kan awm hi kan lawm a ni. Tun ṭuma kan inkhel tur pawh hi Lunglei leh a chhehvela mipuiin min ngaihhlut sak turin kan ngen a ni," tiin Lunglei tlangvalin Lunglei mipui a ngen.

MPFA XI hmachhawn tur Lunglei XI hi Lunglei DFA-in an hnuaia player ṭha an thlanchhuahte an ni a, Lunglei player-ten state pawna tawnhriat nei ṭha player lakah fiahna an hmachhawn ang.