Wimbledon-a chak hnem ber Federer

Tennis tournament upa ber Wimbledon-a hnehna chang hnem ber chu Roger Federer a ni ta. Thawhlehni zan khan Swiss star hian Alexandr Dol­go­polov chu minute 43 chhung lekin 6-3, 3-0 a hnehin Grand Slam inelna ngaihhlutah hian vawi 85 chak ni hmel a hmu ta - record thar a ni.

Kum 35 mi Federer hian Open Era bika sulhnu nei ṭha Jimmy Connors (84 wins), Boris Becker (71) leh Pete Sampras (63) te record a khum a, a thlen chin apiang mai hi record thar a ni zel tawh.

Center Court-a inkhel pa­khat zawkah seeded pahnihna Novak Djokovic chuan minute 40 chhung lekin Martin Klizan chu 6-2, 2-0 a hnehin second round a inhlangkai ve bawk. Serbian tlangval hian kumina tournament hrang hrang a khelah vawi 29 a chakna chiah a ni.

World number 4 Djokovic tan number 1 nih leh theihna kawng a inhawng mek. Djo­kovic hian Wimbledon nomawi a chawi a nih chuan ATP ranking-ah pakhatna a ni thei dawn, mahse a tan chak ringawt a tawk lo; a chunga awm mek Andy Murray leh Rafael Nadal ten semifinal an thlen zawh loh tel a ngai bawk.

Kum 30 mi Djokovoic-a khingpui Klizan (chawn) leh Federer-a hmachhawn Dol­gopolov (kerek) te hi hliam vanga inhnukdawk ve ve an ni. Player ropui pahnihte hian Association of Tennis Professionals (ATP) dan leh hrai siam thar chu Grand Slam inelna huangah seng luh ngaia an hriat thu an sawi nghal.

Inkhel dangah mipui ṭan hlawh Juan Martin del Potro chuan ball vaw na tak Thanasi Kokkinakis chu 6-3, 3-6, 7-6(2), 6-4 in a hneh ve bawk. Kum 2009 US Open champion Del Potro hi player ṭha tak ni mah se hliam a neih ngun avangin a hlawhtling tam tawk lo a, a inkhelh theih chhunah erawh mipui ṭan berte zinga mi a ni.

Roger a Ropui

January thla khan Rafael Nadal hnehin Australian Open nomawi a chawi a, he nomawi hi Federer tan Grand Slam title 18-na chiah a ni. Vawi sarih a champion tawhna Wimbledon-ah hian hnehna a chang leh a nih chuan Sampras (7titles) nena record inṭawm an neih mek chu a khum ang.

Grand Slam nomawi kawl hnem ber Federer hian All England Club-ah a zawnin season 15 chhung chu second round a lut ta. Ukrainian tlangval Dolgopolov nen khan set hnih pawh khel zo hman lo mah se aces vawi 10 a siam hman!

Kum 1991 aṭanga ATP-in statistic mumal tak a neih chinah Federer hian aces vawi 10,004 a siam tling chiah - ani bakah hian Goran Ivanisevic leh Ivo Karlovic te chiah vawi 10,000 aces siam tling thei an la awm.

Hliam vanga buaina!

Thawhṭanni zan aṭangin Wimbledon 2017 khelh ṭan a ni a, ni hnih lek an khelh tawh chinah mipa player pasarih leh hmeichhe player pakhat chu hliam vangin an inhnukdawk tawh. Player ṭhenkhat hi an vanduai vang a ni a, ṭhenkhat erawh an fitness a ṭhat tawk loh vanga ngaih theih tur an awm niin a lang.

Wimbledon-ah hian world ranking-a a sang mipa (104players) leh hmeichhia (108) te chu direct-in an tling sa, singles inelna pahnihah hian wild card pariat ve ve pek an ni bawk. Player 128 an tlinna tura hmun ruak la awm chu world ranking-a 200-na chinin qualifier hmangin an hnawhkhat mai ṭhin.

Kumin kumtir aṭanga mipa tennis thuneitu sang ATP dan hmanah chuan 'Player ten harsatna an nei a nih chuan first round match an khelh hmain an inhnukdawk thei ang a, an sum dawn tur an dawng tho ang' tih a ni. He dan hi Grand Slam paliah hman a la ni ve lo, Wimbledon first round-a chak lo hian £35,000 (Rs 29,28,019) an dawng!

World number 5 Federer chuan, "Player-te hi an fit tawk em tih chu anmahni chiahin an chhang thei ang. ATP dan leh hrai hi hmang ni ila chuan tuna buaina zatve hi a kiang ang. Mi ṭhenkhat chu vanduai vanga hliam an awm, ṭhenkhat erawh an ni lo. Tunah chuan heng zawng zawngte hi bawm khatah kan khung a, a fuh lo a ni," tiin a sawi.

Grand Slam vawi 12 cham­pion tawh Djokovic chuan, "Grand Slam khel tur tling chin player hi chuan lawmman dawn hi an phu vek. He hmun thleng tur hian an kalkawng a thui tawk tawh. Harsatna nei chunga inkhel lui kher lo hian pawisa dawng thei mai se, kei chuan ATP dan thar hi ka thlawp a ni," tiin dan thar hman a duh thu a sawi ve bawk.

Inkhel Thlirna Tawi
Dolgopolov Stats Federer
2 Aces 10
4 Double Faults 1
23/50 (46%) First Serve % In 27/36 (75%)
3/5 (60%) Net Points Won 1/2 (50%)
0/0 (0%) Break Points Won 3/9 (33%)
9 Winners 18
15 Unforced Errors 7
36 Total Points Won 50
1421.7 Distance Covered 1690.8