Lammualah match 3

Lalbiakliana Memo­rial MFA Super Cup 2017 chu vawiin hian Lammualah match thum khelh a ni dawn. Rajiv Gandhi Stadium-ah AIFF D Licence Course kalpui a nih avangin tun kar chhungin Mualpuiah match a awm tawh dawn lo.

MFA Super Cup-ah hian team 63 an tel a, last 32 lut pha chinin Rs 2,500 an dawng a, stage a san ang zelin lawmman dawn a pung dawn a, champion dawn tur zat chu Rs 2,00,000 a ni. Tunah hian first round khelh chhoh mek a ni a, beisei loh result lian­tham thleng a la awm lo.

Vawiin first match-a inkhel tur Raphael FC leh FC Armed Veng South te hi third division club ve ve an ni a, intum tawk tura ngaih an ni.

Chhun dar 12:00-ah third division kai thar Ramhlun Venglai FC-in Aibawk Zone hnuaia club Melriat FC an hmachhawn dawn a, match hnuhnung berah third division club Ramhlun North FC Jr-in Sialsuk Zone hnuaia club Sailam FC an hmachhawn bawk ang.

MFA hnuaiah MPL club pariat an inziak lut a, Mizorama football thuneitu sang ber hnuaiah hian district pariat a awm. Aizawl DFA chu MFA hnuaia district pakhat niin ADFA hnuaiah hian first division club pariat, second division club pariat leh third division club 32 an awm. Heng bakah hian ADFA hian Zone pasarih an la enkawl a, chung zone te chu Aibawk, Sialsuk, Thingsultliah, Phullen, Saitual, Darlawn leh Sakawrdai te an ni.

Vawiin Inkhel Tur
Lammual
Group B - First Round
10:00 AM Raphael FC Vs FC Armed Veng South
Group C - First Round
12:00 PM Melriat FC Vs Ramhlun Venglai FC
02:00 PM Ramhlun North FC Jr Vs Sailam FC
July 7, Zirtawpni
Lammual
Group C - First Round
10:00 AM Phoibi FC Vs Durtlang Leitan FC
12:00 PM Lungverh FC Vs Gogo FC, Kolasib
Group D- First Round
02:00 PM Piler FC Vs LM FC, Hortoki