Pepe-a'n Turkish champion Besiktas a pan

Real Madrid tana a con­tract hmang zo tawh Portugal defender Pepe chuan free transfer-in Besik­tas a zawm, Turkish champion tana a contract ziah chen hi tarlan ni lo mah se report ṭhenkhatah chuan kum hnih daih tia tarlan a ni thung.

Kum 34 mi Pepe hian 2007 khan an ram club Porto aṭangin Real Madrid a zawm a, Spanish club tan hian inelna hrang hrangah match 334 khelin goal 15 a khung - La Liga leh Champions League nomawi pathum ve ve a chawi.

Nikuma Portugal-in Euro nomawi an chawi theih nan khan Pepe hi player pawimawh a ni a, final-a a thlengtu France an hneh ṭum pawhin man of the match atan thlan a ni.

A kum tam deuh tawh mah se Pepe hi French Ligue 1 club hausa Paris St-Germain pawhin an la duh nia sawi a ni. Tunah chuan chona thar hmachhawn turin Vodafone Arena-ah bul a ṭan thar ve leh dawn ta zawk a ni.