Mourinho a lawm tawh lo

Manchester United-in trans­fer laia an player dawr dan hmangah manager Jose Mourinho a lungawi lo. English club hian June thla lai hawla an player hmasa ber defender Victor Lindelof an lakluh hnuah player an la lakbelh lo.

May thla tawpa Europa League an champion zawhah Portuguese manager chuan, "Ed Woodward-a'n ka duh chu a nei," tiin ngaih ṭha takin a ṭawng chhuak a. United hian season thara Champions League an khelh dawn avangin rinrawl ni nghal thei tur player pathum pali vel lakluh an tum nia ngaih a ni.

Hmanhmawh chhan

Manchester United chuan Pa­thianni hian England chhuahsanin United States an pan dawn a, August thla chhung thleng player la lakluh theih mah se Mourinho chuan tour-ah hian player thar hi awm hman turin a duh a ni.

United hian MLS club LA Galaxy (15 July), Real Salt Lake (17 July), Manchester City (20 July), Real Madrid (23 July) leh Barcelona (26 July) te an hmachhawn dawn. United States-a match nga an khelh hnu hian Oslo-ah Valerenga (30 July) an khelhpui leh ang a, Dublin-ah Sampdoria (2 August) nen friendly an khel leh bawk ang.

Lawm lohna chu

United-in Swede defender Lindelof an lakluh hnuah thla chanve a ral leh tawh a, pound maktaduai 31 man defender hnuah mi thar an la thei lo.

Hetichung hian United transfer buaipuitu ber chief executive Ed Woodward chu New Zealand-ah British and Irish Lions ten All Blacks an hmachhawn lai a thlir a. Rugby inkhel en hian Woodward hi player lakluh kawngah a puih a rinawm lo a, tunah chuan Mourinho duh huna player chhawp sak turin kar khat pawh a nei tling tawh lo.

Kawr sen ha tur?

Season liam taa Man­chester United tana goal khung tam ber Zlatan Ibrahimovic chu inhliam vangin a contract an pawhsei sak lo a, hei vang hian Swede forward thlakna tur chu United mamawh hmasak ber a ni.

Red Devils hian kum 26 mi Antoine Griezmann an beisei a, amaherawhchu Atletico Madrid chu transfer laia player lakluh an phalsak loh avangin French forward hian Spanish club chhuahsan a tum lo. Hei vang hian United duhthusam a thleng lo a, Ibra thlak tura an beisei pakhat zawk kum 24 mi Everton striker Romelu Lukaku pawhin a club hlui Chlesea pan a thlang zawk.

United hian Real Madrid forward Alvaro Morata an dawr mek a, kum 24 mi Spanish forward agent leh a pa Alfonso Morata pawhin Thawhṭanni khan Real Madrid hi dawr tawh mah se thuchiang a la awm lo. Real-a hlawhchham Morata hi United kawr sen ha ngei turin lang mah se tun dinhmunah chuan Real Madrid-in a mana an phut zat pound maktaduai 70 bawr vel chu English club hian an la ngam lo niin a lang.

Mourinho hian midfield-a Michael Carrick thlaktu tur a mamawh a, Tottenham player Eric Dier leh Chelsea midfielder Nemanja Matic te hming an sawi ri ring hle. United hian Spurs dawr harsatzia an hrechiang a, hei vang hian Matic zawk hi kawr sen ha tura rinkai zawk a ni. Amaherawhchu Blues hian Monaco aṭanga Tiemoue Bakayoko an lakluh phawt loh chuan Matic chhuahtir an tum lo niin a lang.

United official lamin Inter Milan chu an winger Ivan Perisic chungchangah an be tawh a, mah se tun hnaiah Italian club sum dinhmun a ṭhat chhoh avangin Croatian winger hi an hralh kher a ṭulna a awm leh tawh lo.

Engtin zel?

Mourinho hian season tharah Champions League, Premier League, FA Cup leh League Cup-ah te nomawi chawi vek an tum thu a sawi a, hei vang hian season liam taa league-a parukna club hian inthuam ṭhat an mamawh hle.

Season ṭan hmain Man­chester City, Real Madrid leh Barcelona te an hmachhawn dawn a, inthuam ṭhat an ma­mawh zia an hre chho zel ang.