Chelsea enkawl duh John Terry

Aston Villa defender thar John Terry chuan inkhelh a chawlhsan hunah Chelsea enkawl chu a duhthusam a nih thu a sawi. Kum 36-a upa defender hi a contract zawh avangin Stamford Bridge a chhuahsan a, kum khat chhung cham turin Villa hi a pan.

Chelsea tan Premier League nomawi panga chawitu defender chuan, "Duhthusam atan engmah hi lian tawk tak tak an awmin ka hre lo. A ṭha ber nih hi ka duh reng ṭhin a, chu chu manager ka nih hunah ka puitlin thei a nih chuan Chelsea hi ka hnathawhna tur atana duhthusam chu a ni," a ti.

Blues tana match 717 khel thei defender chuan sawi chhunzawmin, "Chelsea enkawl thei ngat ila chu a ropui ngawt ang, mahse hna hmasa ber thawhna atan chuan Chelsea ang club lian aṭang chuan bul ṭan theih a ni lo tihah ka chiang ve bawk a ni," tiin Chelsea aṭanga a coaching career ṭan theih erawh a inbeisei lo.

Terry chuan a club thar Villa a pan theih nan coach Steve Bruce leh director of football Steve Round te an pawimawh thu sawi nghalin, "Villa Park ka pan theih nan tha an thawhhlawk takzet a, anni nena kan inbiakna khan he hmun pan tur hian min hmin a ni. Steve Bruce hi player a nih lai pawha ka dah san em em a, a hnuaia inzir hlan ka nghakhlel a ni," a ti.

"Steve Round pawh hi coach ṭha tak a ni a, Villa-a a hna hi coaching lam ni chiah tawh lo mah se football a hriatna leh player-te thawh­pui a thiam dan chu a la pang­ngai reng a ni. Bruce nen zah tak chungin mi an dawr a, an club-a khel turin min duh tak tak a ni tih hriat kha ka tan chuan a hlu takzet a ni," tiin a sawi chhunzawm a, Villa tana a khel tur chu a phur hle.