India-in Under 20 World Cup 2019 thlen an dil

FIFA Under 17 World Cup thleng tura inbuatsaih mek India chuan Under 20 World Cup 2019 thlen an duh thu FIFA hnenah an thlen. FIFA U20 World Cup hi Under 17 ang thoin kum khat danah neih ṭhin a ni a, kumina neih zawh a nih hnuah 2019-ah neih leh a ni dawn.

All India Football Federa­tion president Praful Patel chuan U17 World Cup thlen hnua FIFA U20 World Cup thlen chu Indian football hmasawnna kawngah thil pawimawh tak a nih tur thu a sawi a, FIFA World Cup 2022, Qatar organizing committee Supreme Committee for Delivery and Legacy hnenah Praful hian India-in U20 World Cup thlen an duh thu a lo sawi tawh bawk.

Praful-a thukhawchang

Indian FA hotupa Praful Patel chuan, "Kumin October-ah U17 World Cup kan thleng dawn a, he football boruak chhawm nung zel tur hian 2019-a U20 World Cup thlen chhunzawm leh hi India tan a ṭhat kan ring a ni," tiin age level World Cup thlen chu India tan a ṭhat tur thu a sawi.

U20 World Cup hi kuminah South Korea-ah neih a ni tawh a, World Cup awm leh hmasa ber tur Asia veka nghah hi FIFA tan a harsa mai thei. Mahse, Praful chuan beiseina sang tak an neih thu sawiin, "Asia khawmualpuiah kumin World Cup kha nghah ni mah se India chuan kan thlen ve leh theih kan beisei tlat a, FIFA nena inbiakna nei turin kan inhawng reng a ni," a ti.

India a inbuatsaih

India-in FIFA U20 World Cup 2019 thlen a dil a, hetihrual hian kumina U17 World Cup an thlen tur pualin inpuahchahna chak taka kalpui mek a ni. U17 World Cup hi October 6 aṭanga khelh ṭan a ni dawn a, October 28-ah final khelh a ni ang. U17 World Cup hi khawpui paruk Kolkata, Kochi, New Delhi, Mumbai, Guwahati leh Margao khawpuiah khelh a ni dawn a, ram 24-a kum 17 hnuai lam footballer-ten nomawi an inchuh ang.

FIFA leh U17 World Cup 2017 organising committee chuan Kolkata, Guwahati leh Kochi khawpuia U17 World Cup en duh tan ticket chu online-in a zuar chhuak leh tawh. Zawrh hmasak ho chu hralh zawh vek an ni tawh a, tun hi phase 1 bik atana heng khawpui pathuma ticket zawrhchhuah a nih vawi hnihna a ni. July 7 hian U17 World Cup-a intum turte fixture a chiang ang a, hemi zawhah hian ticket zawrh chhuahna phase II chu ṭan leh a ni dawn bawk a ni.

Ticket lak dan

FIFA U17 World Cup ticket hi http://tickets.india2017wc.com... ah lutin lak theih a ni. Ticket hi category 1-4 ah ṭhen a ni. Category 1 (Rs. 800 man a ni a, phase tinah lei theih vek a ni ang), Category 2 (Rs. 400 man a ni a, phase tinah lei theih vek a ni ang), Category 3 (Rs. 200, phase tinah lei theih vek a ni ang), Category 4 (Rs. 80, phase 2, 3 leh 4-ah lei theih a ni ang).

Phase 1 hi May 16 - July 7 inkar a ni a, hetah hian 60% discount a awm thei ang. Phase 2 hi July 7 - July 21 chhungin hawn a ni ang a, Visa card nei tan 50% discount a awm ang. Phase 3 hi July 21 - October 5 ah hawn ṭan a ni ang a, 25% discount a awm thei ang. October 6 - October 28 inkarah phase 4 hawn leh a ni ang.

Eng nge a hlawkna?

Zawhna tam tak a awm thei a, age level World Cup thlen hi eng nge a hlawkna? tih hi zawhna langsar tak pakhat a ni. Sum leh pai leh thil dang danga India-in hlawkna a tel tur chu thuhran lo ni ta se, football thlirnaaṭang chuan age level World Cup mah nise media-ten cricket an atchilhna khawvela football-in hmun tam tak a luah tur ringawt pawh hi a hlawk thlak hle.

Hei mai a ni lo, nakin lawka khawvel huap hriat hlawh tur footballer beiseiawm rual an lokal dawn. USA tana inlan tur Josh Sargent hi Europe club liante chil tiputtu a ni der tawh a, England tana inlan tur Manchester City midfielder Jadon Sancho leh Liverpool striker Rhian Brewster-te hi Premier League-ah kan la hmuh fo an beiseiawm a, France tana Lyon rawlthar duhawm pahnih Amine Gouiri leh Maxence Caqueret inlan turte, Spain thiampuipa, Barcelona academy-a awm mek Abel Ruiz te, Real Madrid-in pound maktaduai 39 chuanga an lakluh hlim Brazilian rawlthar Vinicius Jr. te hi 'live' ngeia hmuh an nuam khawp ang.