Number 1 Kerber a chak

World number 1 Angelique Kerber chuan Wimbledon first round-ah Irina Falconi chu darkar khat leh minute 27 chhungin 6-4, 6-4 in a hneh a, inkhel dangah Karolina Pliskova leh Agnieszka Radwanska ten hnehna an chang ve bawk.

Centre Court-a inkhelah Kerber hian world number 247 Falconi lakah awlsam takin hnehna a chang bik lo. Winners vawi 15 vaw thei mah se hemi zat chiah hi unforced errors a nei bawk, round sang lamah chuan tihsual neih tlem a pawimawh ang.

German nula Kerber hian season hmasa khan Australian Open leh US Open nomawi a chawi a, Wimbledon final a lut bawk. Kuminah erawh Australian Open nomawi a hloh a, French Open first round-ah a tla nghal bawk.

Kum 29-a upa Kerber chuan, "Eng inelnaah pawh ka tan chuan first round hi a harsa ṭhin. Inkhel hautak takah hnehna ka chan leh theih tak avangin inrintawkna ka neih belh a, ka ṭhat dan bera ka khelh chhuah zel theih ka beisei," tiin a sawi.

Inkhel dangah world number 3 Karolina Pliskova chuan a khelh ṭhat chhawm nung zel turin Evgeniya Rodina chu 6-1, 6-4 in a hneh. Pliskova hian hmanni lawk khan Caroline Wozniacki hnehin Aegon International nomawi a chawi.

World number 1 hlui Wozniacki pawhin inkhel inhnehtawk takah Hungarian nula Timea Babos chu 6-4, 4-6, 6-1 in a hneh. Kum 2012 Wimbledon finalist Agnieszka Radwanska chuan number 1 hlui Jelena Jankovic chu 7-6 (7-3), 6-0 a hnehin second round a inhlangkai ve bawk.