Manchester United leh Everton an inrem ; Pound maktaduai 75 man Lukaku
Zlatan Ibrahimovic thlakna tur Manchester United-in an hmu ta, a hming chu Romelu Lukaku a ni. Belgian striker manah hian United leh Everton chu pound maktaduai 75-in an inrem. Jose Mourinho hoten Pathiannia pre-season friendly khel tura United States an pan hmanin Lukaku hian contract a ziahfel hman beisei a ni.
Lawmna tham
Manchester United manager Mourinho chuan June thla laihawla defender Victor Lindelof an lakluh hnuah player dang an ziah belh lawk loh avangin a lungawi loh thu chu khawthlang media lamin an ziak uar a, tunah chuan lungawina tham player an lalut.
Belgian striker Lukaku hi kum 24 chauha upa a ni a, feet ruk leh inches thuma sang a nih bawk avangin United player thar hi tun lai striker langsar ber zinga mi a ni. Mourinho-a'n season liam ta khan a club enkawl hlui Chelsea a tluk lo a, nipui transfer-ah erawh Blues lakluh tum Lukaku a chhuhsak.
Lukaku hian season liam ta khan league-ah Everton tan goal 25 a khung a, Premier League-ah goal 53 a khung tawh bawk. Beligan striker hian English league-ah tawnhriat a neih ṭhat avangin United lak tum zinga mi Alvaro Morata aiin a thlan awm zawk.
United hian Belgian striker an lakluh hma hian Spanish striker Morata lakluh tumin a vawi thumna atan Real Madrid chu pound maktaduai 65.9 (€75m) in an dawr a, amaherawhchu Spanish club hian an phalna zat pound maktaduai 79 (€90m) aṭanga an tlak hniam duh loh avangin English club hian ngaihven zui tawh lo ang.
United an vannei
Lukaku agent Mino Raiola hi Paul Pogba, Zlatan Ibrahimovic leh Henrikh Mkhitaryan te agent tho a ni a, heng player ṭha pathum hi nikum nipui laia United lakluh an ni. Tun ṭuma United-in Belgian striker an lakluh theihna kawngah Raiola hian kawng thui tak a sial tura a ngaih a ni.
Belgian striker Lukaku chuan, "Dinhmun ngai renga din ka duh lo a, hma sawn zel ka duh. Ka tana ṭha tur chu ka hria," tiin March thla khan Everton chhuahsan a duhthu a sawi. United-in Europa League nomawi hmanga Champions League an khelh theih zarah an mamawh tak striker hi an chan phahah ngaih theih bawk.
Chelsea tan channa
Chelsea manager Antonio Conte chuan champion-na kawnga player pawimawh Diego Costa chhawr zui a tum loh thu a hrilh tawh a, hemi thlakna tura an duh ber nia lang chu Lukaku a ni.
Amaherawhchu, Blues-in Belgian striker an chang tawh lo a, hei vang hian Morata leh Torino forward Andrea Belotti te lama an awn theih dan a awm. Heng player pahnih hi Lukaku aia dah hniam zawk an ni a, tun dinhmunah chuan Premier League champion hi transfer-ah an la che ṭha tawk lo.