Mizoramah futsal Kalphung mumal zawk

FIFA futsal dan zul zuiin Mizoram Football Association chuan, tun season chhungin futsal chu awmze neia mumal taka kalpui tum a ni. He­mi chungchangah hian Mizorama football thuneitu sang ber chuan All India Football Federation a dawr tawh bawk a, AIFF lam pawhin MFA chungah beiseina an nei sang hle.

August, 2017-ah hian Asian Football Confederations hnuaia futsal buaipuitute chuan India tlawhin futsal chungchanga hmalak dan tur an zir chiang dawn a, AFC hnuaia inzir tur hian Mizoram aṭangin futsal match official training tur tir turin AIFF lamin MFA an hriattir tawh a ni.

Tun hnaiah AIFF dawrin MFA honorary secretary leh MFA futsal committee chairman ni bawk Lalnghinglova Hmar chu New Delhi-ah a kal a, MFA-in futsal kalpui a tum danah AIFF hruaitute an lawm hle. MFA chuan dan leh hraite hi mahni remchan anga hmang mai loin, FIFA futsal dan angin a kalpui dawn a ni.

AIFF technical direc­tor Savio Mediera chuan, "India-ah mumal taka futsal kalpui a la ni lo a, khawi khawiah emaw futsal inelna hi awm ve bawk mah se FIFA dan anga kalpui leh AIFF-AFC-FIFA hriatpuinaa kalpui a la ni lo. Tun season-ah AIFF-in awmze neiin kalpui tan kan tum a, August-ah hian AFC hotute an lo zin ang a, Mizoram hmalakna pawh hi kan lo hrilh ang. Ṭha takin Mizoram lamah futsal hi in kalpui thei ang tih kan ring a, a lawmawm kan ti khawp mai," a ti.

AIFF head of referees Col. Gautam Kar chuan, "Football-in dan a nei a, FIFA dan ang thlapa khelh a ni. Futsal pawhin dan a nei a, mahse khaw hrang hranga an khelh dan a inang lo a, hei hi AIFF hmalakna ni loa inkhel an kalpui vang a ni. India ramah hian futsal anga chhal theih, mahse football dan pangngai kaihlek ang maia khelh hi a tam hle a ni. AFC aṭangin kan referee-te training petu tur an rawn kal dawn a, chutiang zelin AIFF pawhin state hrang hrangah futsal referee training hi kan kalpui ang a, Mizoramah pawh kan nei ang," tiin a sawi.

MFA chuan tun season chhungin futsal league bakah futsal tournament hrang hrang a buatsaih dawn a, club affiliation leh player registration pawh a kalpui dawn a, hmeichhe pual futsal inelna leh kum bithliah intihsiakna (age group competition) pawh a siam dawn a, MFA futsal committee-in a kimchangin a la rel ang. MFA chuan futsal kalpuina tur hian a hranpain budget a siam tawh a ni.