Arsenal player manto ber Lacazette

Arsenal chuan an player manto ber ni turin Alexandre Lacazette chu French Ligue 1 club Lyon aṭangin an lalut. France striker man zat hi hi pound maktaduai 46.5 niin Emirates Stadium-ah kum nga chhung cham turin contract a ziak a, a man hi pound maktaduai 52.6 thlenga pung chho thei tur a la ni.

Gunners hian kum 2013 khan Mesut Ozil chu Real Madrid aṭangin pound makta­duai 42.4 in an lalut tawh a, Germany international midfiel­der man zat hi Lacazette hian a rawn khum chiah. Kum 26 mi Lacazette hian tunkar chhungin Arsenal training a zawm nghal dawn a, karleha Sydney, Australia-a an zin hunah pawh a tel ve zui nghal bawk ang.

Duhthusam

Kum 2003-04 season khan Lyon naupang Lacazette hian kum 12 mi chauh niin Lyon academny a zawm a, he mi kum hian Arsene Wenger-a kaihhruaina hnuaiah France international Thierry Henry, Patrick Vieira leh Robert Pires te chuan 'Invincibles team' dinin Premier League nomawi an chawi.

Lacazette chuan, "Arsenal tan hian French player tam tak an khel tawh ṭhin a, an hnungzui ka chak thei hle. Ka naupan lai aṭanga ka duhthusam pakhat chu he club tana khelh ve hi a ni, tunah chuan ka duhtusam a thleng dik ta," tiin Henry te hnungzui chu a duhthusam a nih thu a sawi.

France tana match 11 khel tawh Lacazette chuan sawi chhunzawmin, "Striker ka nih avangin goal khung hi nuam ka tiin ka tum ber a ni. Chutihrualin pet goal ringawt a ni ber lo a, football hi mawi taka khelh chhuah theih a nih zia lantir ka duh a ni," a ti.

France international Laca­zette hian an khaw club Lyon tan inelna hrang hrangah match 275 a khelhah goal 129 a khung tawh a, season liam ta bikah khan Ligue 1-ah goal 28 khungin season khat chhunga a goal khung hnem ber ṭum a tawng. A tluk loh chu goal 35 khungtu Paris St-Germain striker Edinson Cavani chiah a ni.

Arsenal manager Wenger chuan, "Alexandre hi goal khung thei tak mai a ni a, a che rangin a rilru a huaisen bawk. Club ti chak thei tur player kan zawng ṭhin a, ani hi hma lam min pan pui thei tura kan ngaih a ni," tiin a sawi.

Kum 10 liam ta khan Arse­nal scout Gilles Grimandi chuan Lacazette hi a lo va thli­thlai daih tawh. Kum 2014-15 season bikah khan league-ah goal 27 khungin Ligue 1 Player of the Year atan thlan a ni a, tun hnai season thum chhung chu goal 20 chuang a khung ziah.

Kum 67 mi Wenger-a'n Arsenal chu Champions League khelh pui dawn lo mah se sum an theh chhuak phal a nih phawt chuan player langsar chu an la hip reng tih a chiang. Lacazette lakluh duhtu hi Arsenal chauh an ni lo, Europe club lian tam takin an enthlak a ni. Atletico Madrid ngei pawhin lakluh tumin an bei tawh, mahse La Liga club hi hrem an nih avangin nakkum January thla hma chu player thar an lalut thei lo.

Engtin zel?

Nipui transfer chhungin Gunners hian defender Sead Kolasinac an lalut tawh bawk a, player langsar dang pawh an la melh reng bawk. Player thar seng luh an tum rual hian an neih sa - Alexis Sanchez, Mesut Ozil, Olivier Giroud, Alex Oxlade-Chamberlain leh Jack Wilshere te hma lam hun tih chian pawh hi Wenger tan hna pawimawh berte zinga mi a ni.

Season hmasa khan San­chez-a'n Premier League bikah goal 24 a khung a, a hnungah Giroud (12 goals), Theo Walcott (10), Alex Iwobi (3) leh Danny Welbeck (2) te an awm. Ligue 1 leh EPL khaikhin chi a ni lo a, chutihrualin striker palian Giroud hian Gunners a zawm hnuah season khat chhungin league-ah goal 20 khung tlin a la nei ngai lo - Lacazette lakah mawhphurhna a sang dawn.