Nadal-a'n Young leh Grass a ngam
Rafael Nadal chuan darkar hnih leh minute 11 chhunga Donald Young 6-4, 6-2, 7-5 a hnehin Wimbledon third round a lut. Nilaini zan inkhel dangah champion lai Andy Murray pawhin harsatna nei loin second round a paltlang ve bawk.
Centre Court-ah Nadal hian winners vawi 37 a vua a, heng zing a tam zawk hi forehand hmanga a neih niin a first serve aṭangin 80% zet point a hmu. Grand Slam vawi 15 champion tawh hian inrintawkna nen attacking game hmuhnawn a khel a, world number 43 Young tan dan ngaihna a awm lo - tun hnai an intawn vawi thumah Nadal a chak fai vek.
Wimbledon-ah bik Spanish tlangval Nadal hian a hun laia world number 100 hnuai lam vek - Dustin Brown, Nick Kyrgios, Steve Darcis leh Lukas Rosol te chu kum 2012 - 2015 inkar khan a ngam lo. Season hmasa khan a ban rek na vangin a inlan lo bawk, kum 2011 hnu lama third round a luh lehna hmasa ber a ni.
French Open nomawi vawi 10 chawi thei hian season duhawm a hmang mek a, tun hnaia beisei a phak lohna grass-ah pawh a khelh ṭhat a chhawm nung zel. Vawi hnih a champion tawhna All England Club-ah hian nomawi chawi tura rinkai a ni leh der tawh.
World number 2 Nadal chuan, "Set hloh loa third round luh theih hi ka tan result ṭha tak a ni. He inelnana hi a hlut bik em avangin pressure insiam chawp ka duh lo a, zawi muangin ka inkhelh a piangah nuam ti taka khelh zel ka tum," tiin a sawi. Seeded palina Nadal hian Zirtawpniah seeded 30-na Karen Khachanov a hmachhawn leh ang.
Murray a lawm
World number 1 Murray-a'n Dustin Brown lakah 6-3, 6-2, 6-2 a hnehna a chan hnuin a service ṭha nei let leh ta chu lawmawm a tih thu a sawi chhuak. Britain number 1 hian zaninah seeded 28-na Fabio Fognini a hmachhawn leh nghal ang.
Wimbledon nomawi vawi hnih chawi tawh Murray hian second round inkhelah hian hnehna chang turin darkar khat leh minute 36 chiah a mamawh a, unforced errors vawi nga chiah neiin aces vawi 9 a siam thei.
Kum 30 mi Murray chuan, "Game hnuhnung pathumah beisei ka phak lo deuh tih mai loh chu ka service kha duhthusama ṭha ka nei chho leh tawh. Harsatna nei loin ka che kual vel thei a, Fognini nen kan inkhelh leh hunah pawh tun ang bawka ṭha hian khelh leh ka tum ang," a ti.
A hliam chungchang sawi chhunzawmin Murray chuan, "Ka khel bawr na vangin ka buai fo a, inelna tak tak kan hmachhawn hnuah erawh ka buai phah lo. Ka inkhelh loh karah pawh ka fitness tiṭha turin ka thawkrim hle a ni," tiin a sawi.
Inkhel dang
Wimbledon semifinal vawi thum khel tawh Jo-Wilfried Tsonga tan third round lut turin darkar hnih pawh hun a ngai lo. French tlangval hian Simone Bolelli chu 6-1, 7-5, 6-2 in a sawp.
Seeded 12-na Tsonga hian ṭum dang ang lo takin zana inkhelh chu nuam a tih thu a sawi a, third round-ah chuan American star Sam Querrey nen an inhmachhawn leh ang. Querrey hian Nikoloz Basilashvili chu inkhel inhnehtawk takah 6-4, 4-,6 6-3, 6-3 in a hneh ve bawk a ni.
US Open champion hlui Marin Cilic-a'n Germany tlangval Florian Mayer chu 7-6 (7-2), 6-4, 7-5 in a hneh a, ani hian Steve Johnson a bi tum zui ve leh bawk ang.
Asia mipa zinga thleng sang ber sseded pakuana Kei Nishikori-a'n Sergiy Stakhovsky lakah fiahna hautak a paltlang. Japan star hian darkar thum leh minute 15 an inkhelh hnuah 6-4, 6-7 (7-9), 6-1, 7-6 (8-6) in hnehna a chang hram, fourth round lut tur chuan seeded 14-na Lucas Pouille a paltlang leh a ngai dawn.
Inkhel Thlirna Tawi
Nadal Stats Young
4 Aces 8
2 Double Faults 3
55/85 (65 %) 1st Serve % In 68/104 (65 %)
27/34 (79 %) Net Points Won 20/34 (59 %)
5/9 (56 %) Break Points Won 1/3 (33 %)
38 Winners 31
16 Unforced Errors 22
107 Total Points Won 82
1866.0 Distance Covered 1976.5