Huddersfield-in an record an khum zel!

Premier League kai thar Huddersfield chuan nipui transfer bazar-a a vawi thum nan an trans­fer record an siam leh ta - Montpellier striker Steve Mounie chu an club player manto ber ni turin an lalut. Terriers (Hud­dersfield sawina) hian Championship club Ful­ham aṭangin defender Scott Malone chu a man zat puan zar lohin kum thum chhung atan an lalut bawk.

Kum 22-a upa striker man zat hi puan zar ni lo mah se Huddersfield player manto ber a ni tih erawh puan a ni a, a man zat hi pound maktaduai 11.44 vel nia ngaih niin a khelh ṭhat dan a zira la pung leh thei tura ruahmanna siam a ni.

Benin international hian season hman zawh takah khan Ligue 1 club Montpellier tan match 32-ah inkhel bul a ṭan a, goal 14 ngawt a khung sak. Premier League-ah goal tam zawk a khung an beisei ang.

Huddersfield coach David Wagner chuan, "Steve hi a pian a dik em em a, Premier League-a khel tur striker pian dik tak a ni. Kum 22 chauha upa a la nih avangin hma a la sawn dawn chauh tih a chiang reng a, a theihna neih tawh sa ngaihtuah tel phei chuan a phurawm takzet a ni," tiin striker thar an lalut thei chu a phur hle.

Premier League club thar hian Porto striker Laurent Depoitre chu June 23 khan an player manto ber ni turin pound maktaduai 3.5-in an lalut a, inremna an neihfel vek hnuah Manchester City midfielder Aaron Mooy chu pound maktaduai riatin kar hmasa khan official-in an lalut a, tunah Mounie hmangin an transfer record an khum leh ta.