Everton leh Rooney an inhnaih
"Manchester United chhuahsana Premier League club dang ka zawm dawn a nih chuan Everton a ni ang," tia lo sawi tawhtu United captain Wayne Rooney chu a chawrchhuahna Everton chuan laklet leh ngei tumin an dawr mek.
Everton chairman Bill Kenwright chuan Wayne Rooney adviser Paul Stretford chu Nilaini khan London khawpuiah inbiakna a neihpui a, inremna erawh neih a la ni lo thung.
August 2004-a Goodison Park aṭanga pound maktaduai 27-a Manchester United pantu Rooney hian Jose Mourinho enkawlna hnuaiah Old Trafford-ah hmun pawimawh a chang phak meuh tawh lo a, season hman zawh takah khan Premier League match 15-ah chiah inkhel bul a ṭan a ni.
May thla khan Rooney hian Old Trafford-a cham a duh leh duh loh chungchanga zawhna chu, "Kum 13 chhung hun ka lo hman tawhna a nih avangin he club-ah hian cham ngei ka duh a, mahse hriatreng ṭul erawh football khelh ka duh tih hi a ni," tiin a inkhelh tam theih dawn loh chuan chhuah mai a hnial loh thu a lo sawi tawh.
Everton neitu zinga share ngah ber Farhad Moshiri chuan Rooney lakluh ngei hi a duh nia sawi a ni a, Everton director of football Steve Walsh chuan February khan Rooney laklet theihna chance an neih phawt chuan an bawhzui tur thu a lo sawi tawh bawk.
Khawthlang media-te chuan Everton hian Rooney hi kar khata £250,000 hlawhtir an inhuam niin an sawi a, United hian free transfer-a kaltir an pawiti lo niin an tarlang bawk.