Real-in Atletico defender an lalut
Spanish champion Real Madrid chuan an hmelma kumhlun Atletico Madrid aṭangin left back Theo Hernandez an lalut. Kum 19-a upa defender manah hian pound maktaduai 22.8 an inseng a, kum ruk chhung an hnena khel turin contract an ziahpui a ni.
French defender Theo hi Atletico Madrid academy chhuak ni mah se Diego Simeone-a enkawl team tan vawi khatmah a inlan hman lo a, season hmasa khan Alaves-ah loan-a khelin inelna hrang hrangah match 38 a inlan sak.
Season hmasa ṭan dawn khan Theo hi a unaupa Lucas nena Manchester City-in lakluh an tumna chu Atletico Madrid hian an lo hnar sak tawh a, Real erawh an dang zo lo.
Atletico chuan thuchhuah siamin, "Theo hian kan hnenah kum 2021 thleng cham turin contract nei mah se contract thar kan zawrh pawh a hnar fo a, Europe club dang sawmna pawh a hnar tho. Real Madrid tana khelh hi a chak a, khawdang hawi a tum lo a ni," tiin Santiago Bernabeu lama an defender an kaltir chhan an sawifiah.
Real-in Theo an neih rualin full back Fabio Coentrao chu loan-in an chhuahtir bawk a, kum 29-a upa defender hian Sporting Lisbon a zawm. Portugal international hian kum 2011 khan Benfica aṭangin Real hi pound maktaduai 27-in a zawm a, La Liga leh Champions League-ah vawi hnih ve ve champion nomawi a chawi hman.
Coentrao hian Real tan inelna hrang hrangah match 106 zet a khelh sak a, loan-a Sporting Lisbon a pan hma hian Monaco-ah season khat chhung loan-in a lo khel tawh bawk.