NADA-in Subrata hremna sut

National Anti-Doping Agency (NADA) chuan Subrata Paul chu damdawi hman phal loh hman chungchanga an hremna an sut a, India rama football thuneitu sang AIFF leh team doctor-te chu na takin an zilh bawk.

Kum 30 mi Subrata hian March 18 khan doping test neiin a paltlang zo lo a, National Dope Testing Laboratory (NDTL) chuan India international goalkeeper zunah damdawi hman phal loh Terbutaline (Beta-2-Agonist) an hmu. Hei vang hian Subrata hi hrem lai lawk a ni a, Anti Doping Disciplinary Panel (ADDP) chuan May 31 leh June 12 khan insawifiah turin koh a ni a, July 5 khan thutlukna puanzar a ni.

NADA chuan, "Subrata Paul hian damdawi hman phal loh chungchangah dan bawhchhe mah se tum reng vanga hman tum lo a ni tih a finfiah theih avangin a hremna hi hlih a ni," tiin thuchhuah siam a, All India Football Federation chu fimkhur loh vanga an zilh thu an tarlang tel bawk.

July 1-a Mizoram XI leh FPAI XI inkhelh ṭumin Subrata hi a rawn inlan a, hemi ṭum hian, "Tihsual ka nei lo a, doctor-te'n ei tura min tihah dan phal loh a lo awm vang a ni. Chuvangin hlauhthawnna tur a awm lo a, hremna ka pumpelh ang," tiin Vanglaini a hrilh a, result chhuakah a thusawi dikna a lang.

Arjuna Award dawng tawhtu Subrata hi season liam ta khan DSK Shivajians tan I League-ah a inlan a, ISL-a a khelhna NorthEast United chuan an player chelh zinga an telh hmel loh avangin July 23-ah ISL player draft zingah a tel a rinawm. Draft zinga a tel a nih ngat chuan TATA Football Academy chhuak Subrata hi football a zir chhuahna hmun Jamshedpur-a ISL club thar Tata Steel team-in an ngaihven ang.