July 15 hmain ISL coach chian a ngai

Indian Super League thuneitute chuan tun season ISL khel tur club-te chu July 15 hma ngeia an coach-te tichiang turin an ti. November aṭanga khelh ṭan tur ISL-ah club 10 an awm a, an zinga club parukin coach tur tichiang tawhin club paliin an coach tur chungchangah thuchiang an la nei lo thung.

Pune City leh Mum­bai City-ten season hma­saa an coach ve ve an chhawr nawn dawn a, Pune hi Antonio Lopez Habas kaihhruaina hnuaiah khelin Mumbai hi Alexandre Guimaraes chuan a enkawl chhun­zawm thung ang.

FC Goa-in Zico an chhuahtir hnuah Bar­celona academy hming­thang La Masia-a kum riat chhung coach lo ni tawh Sergio Lobera an lalut a, Delhi Dynamos-in Real Madrid technical director hlui Miguel Angel Portugal an lalut thung.

Chennaiyin FC leh Marco Materazzi an inṭhen hnuah Super Ma­chans hian Aston Villa leh QPR coach hlui John Gregory an lalut a, Bengaluru FC-in season hmasa I League ṭan dawn an lakluh Albert Roca an chhawr chhunzawm ang.

NorthEast United-in Malaysia coach thar Nelo Vingada an chelh theih loh hnuah coach thar an la nei lo a, Kerala Blasters-in season hmasaa final luh­puitu coach Steve Coppell chu hlawh tam zawk hlawh turin an sawm mek nia sawi a ni a, Atletico de Kolkata-in coach thar tura sawi rik an la nei lo a, Tata Steels lamin thuthar an la nei lo bawk.