FIFA ranking Top 100 huang chhungah India!
February 2015-a Stephen Constantine-a'n a vawi hnih nana India a enkawl khan a thusawi hmasak chu "Top 100 huang chhungah India awmpui ka tum ang," tih a ni a, July 2017 a thlen meuh chuan India hi FIFA top 100 huang chhungah an awm ta - ranking chhuak thar berah hian 96-na an ni.
February 1996 khan India hi FIFA ranking-ah 94-na an ni tawh a, tun hi kum 1996 hnua FIFA ranking-a top 100 huang chhunga an awm lehna hmasa ber a ni. India hian 96-na dinhmun luah tur hian hmun liin hma an sawn a, point 341 an nei. Heti zat point hmu tur hian ranking hnuhnung ber aṭangin point 10 an hmuh belh. Asian Football Confederation huang chhungah chuan India hi 12-naah an awm.
Zinkawng chu
Constantine-a'n a vawi hnih nana India coach dinhmun a luah khan Vanglaini chuan English coach biangbiakna a nei nghal a, a hna thar chungchangah, "Ka tan chuan chona phurawm tak a ni a, phur takin ka hmachhawn ang," tiin Vanglaini a hrilh. A sawi ang ngeiin English manager-in a hna a thawk a, kum hnih chhungin FIFA ranking-ah India hi 77-in hma a sawn pui.
India hian he dinhmun luah tur hian an match hnuhnung 14-ah vawi 12 hnehna an chang thei a, June-a international break-ah pawh khan match hnih khelin hnehna an chang ve ve. Nepal chu friendly match-ah 2-0 in an hneh a, 2019 AFC Asian Cup qualifiers group matchp-ah Kyrgyzstan chu 1-0 in an hneh bawk.
Constantine thukhawchang
India coach Stephen Constantine chuan , "India ka enkawl ṭan tirh khan top 100 huang chhungah ka hruai luh tur thu ka sawi a, he hmasawnna kawnga tha ka thawh ve thei hi ka hlimin ka lawm takzet a ni. Ka player, staff leh AIFF-a ka thawhpuite zawng zawng chungah lawmthu ka sawi a ni," a ti.
English coach chuan an hna an hlen ta tihna erawh a la nih loh thu sawiin, "FIFA ranking avang hian thil ropui tak kan ti taah inngaih tur a ni lo. Kan hmalam hunah kan rilru zawng zawng kan pek a, chona thar kan hmachhawn a ṭul dawn a ni," tiin zinkawng a la tawp loh thu a sawi.
Mizo in an thawhhlawk
India-in kum hnih chhunga hma an sawnna kawngah Mizo tlangval ten tha an thawhhlawk a, Mizo tlangval Jeje Lalpekhlua a langsar hle. Hnahthial tlangval hian December 2015 hnu lamah India tan match 12 a khel a, goal 10 ngawt a khung. A goal khung zinga pakhat erawh Bhutan nen unofficial match-a a khung a ni.
Kum hnih chhung hian India senior team tan Jeje bakah Lalchhuanmawia Ralte, Daniel Lalhlimpuia, Lallianzuala Chhangte, Isaac Vanmalsawma leh Jerry Lalrinzuala te chu ram tan an inlan.
A chung berah Germany
FIFA ranking chhuak thar berah Confederations Cup champion Germany-in champion 'man' an hmu a, a chung berah an awm. Joachim Low-a naute hian pakhatna dinhmun aṭangin Brazil chu an nek chhuak a, World Cup 2018 khel tura tling tawh Brazil hi pahnihna niin Argentina chu pathumna an ni.
Spain chu top 10 huang chhung aṭangin petchhuah an ni a, 11-na dinhmun an luah. Confederations Cup final-a Germany ngam lotu Chile chu hmun thumin an tawlh hniam a, pasarihna an ni. Cristiano Ronaldo-te ram Portugal chuan hmun li laia hmasawnin palina an ni thung.