Anastasia VC an lo kir dawn

Nimin tlai khan R. Dengṭhuama Indoor Stadium, Mualpuiah Pro Volleyball League cham­pion hmasa ber Anastasia Volleyball Club chuan Sports and Youth Servives 3-2 a hnehin Mizoram Volleyball Association (MVA) hnuaia inelna sang ber PVL 3 khel turin an tling leh ta, Electric Veng club hi Pro Division Club an ni nghal bawk.

Kumin MVA Pro Division Playoff-ah hian team 13 an inel a, group paliah ṭhen hran niin an inkhelh kual hnuah a sang pahnih ve ve in semifinal an lut a, chumi hnuah final khelh a ni.

MVA hnuaiah TNT, Hunthar, 3rd MAP, Chhinga Veng leh Ram­hlun Sporting Club te chu Pro Division club an ni sa a, anni bakah hian Anastasia hi an tlin belh - club parukte hi PVL season 3-ah an inlan dawn.

Volleyball Federation of India bultuma July 3 a ṭanga neih ṭan North East Zone Coach & Refree Refresher Course chu nimin khan zawh a ni bawk. He hunah hian coach 25 leh referee 13 ten training an nei a ni.