ATK tana khel tur Prabir Das

Atletico de Kolkata chuan season thar atana player an chelh theih zat pahnih an tichiang ta a, vaibelchhe khat chuang hlawh tura Debjit Majumder an chelh hnuah Prabir Das an chelh thu an puang leh ta. Kum 23-a upa defender hian I League-ah Mohun Bagan tan a khel a, Majumder ang thoin ISL lama khelh chhunzawm a thlang ta a ni.

Hetihlai hian FC Goa chuan Mandar Rao Dessai an chelh thu an tichiang ve leh bawk. Goan club hian goalkeeper Laxmikant Kattimani an chelh thu an lo tichiang tawh a, Indian senior player an chelh theih zat chu an chelh kim ta tihna a ni. Mandar Rao hian I League-ah khan Bengaluru tan a khel.

ATK leh FC Goa-in an player chelh tur an tihchian laiin Kerala Blasters beiseina erawh a thamral a, Mehtab Hossain chu chelh tum mah se Bengali midfielder hian Blasters sawmna hi hnawlin player draft zinga tel a tum thu a sawi.

Mehtab hian I League-a a khelhna East Bengal aṭang pawha sawmna a hmuh thu sawi nghalin, "East Bengal pawhin min sawm ngei a, he club hi ka hmangaih em em bawk. Mahse, I League nomawi kan chawi loh chuan ka chhuahsan tur thuin ka intiam a, ka thutiam tihhlawhtlin ka duh a ni," tiin Kolkata club sawmna a hnar chhan a sawi fiah nghal.