Novak Djokovic a inpuang Inkhelh chawlhsan a tum hman

Tennis world number 1 Novak Djokovic chuan tun hnaiah kum 2010 laia a hun tawn chanchin a sawi a, inkhelh chawlhsan tumna a neih hman thu a sawi chhuak.

Serbian tlangval hian 2008 khan a Grand Slam nomawi hmasa ber ni turin Australian Open nomawi a chawi a, a hma kumin US Open final lut mah se Roger Federer a ngam lo.

French Open 2010 an khelh lai khan Djokovic-a'n ATP Tour title 10 a nei tling tawh. Mahse, khatih hunlai khan ngam theih loh pahnih a nei. Roger Federer nen inelna liana an inhmachhawn pangaah vawi li ngawt a tlawm.

Rafael Nadal pawh atan a lian lutuk, Grand Slam bika an intawn hmasak paliah Nadal hi a ngam lo vek; player ropui pahnih kara chawr chhuah theih a inbeisei lo a, tennis chawlhsan mai a tum hi a mak lo.

Djokovic chuan, "2010 Roland Garros quarterfinal-ah khan Jurgen Melzer ka ngam lo, ka tla kha na ka ti em em a, ka hma hun tur ka ngaihtuah khan thim vek ni berin ka hria.

"Ka indawm kun a, ngun takin ka inngaihtuah. 2008-ah Australian Open nomawi ka chawi thei a, 2010 a nih chuan world number 3 ka ni tawh bawk. Mahse ka hlim chuang si lo, inkhel pawimawh bikah Federer leh Nadal ka ngam lo bawk si, chawlh mai kha ka duh," a ti.

Hun harsa a tawh laiin Djokovic a harh chhuak, huaisen taka chona hmachhawnin tunah chuan Federer leh Nadal te huangah a invawrh thei. Djokovic chuan, "Ka chantawka ka lungawi loh avangin pressure ka insiamchawp.

"Boruak kha a ṭha lam zawngin ka thlir lui tlat a, mahni inveng ringawt loin huaisen taka khingpuite beih let ka zir. Tun thlenga ka thil tih fuh leh zir chhuah ṭha ber a ni hial ang," tiin a sawi.

Grand Slam vawi 19 champion tawh Djokovic hian tennis match a khelh tawh zinga ropui a tih an zawhna chu Wimbledon 2019 final kha niin a sawi. Inkhel hmuhnawm leh hriatreng tawh turah Federer a hneh.

Wimbledon vawi riat champion tawh Federer-a'n championship point a hmuh a chhawr ṭangkai thei lo a, set ngana an khelh lai hian 12-12 te in an inel zak zak; a tawpah Djokovic zawk vanneiin nomawi a chawi.

Djokovic chuan, "Match ka khelh tawh zinga ka khelh ṭhat leh ropui ka tih a ni. 2012 Australian Open final Rafa nena kan khelh nan khan huang khatah ka dah, thil engkim kha a thleng thei ni maiin ka hria.

"Centre Court-a Roger nena inkhelh chu a boruak hi a danglam hrim hrim a, a tir aṭanga a tawp thleng hian a ni chu 'class' tak maiin a khel thei. Khatiang inkhel ropui bik kha chu tennis khelh hun chhung hian vawi khat emaw, vawi hnih emaw bak a thleng ngai lo ang," a ti.