Opening match-ah India vs United States

FIFA Under 17 World Cup 2017 ṭan nan ni 90 chiah a awm tawh a, nizan khan Sahara Star Hotel, Mumbai-ah official draw neih a ni. He hun bik hi Under 17 World Cup nomawi chawi tawh pahnih Nigerian legend Nwankwo Kanu leh Argentinian legend Esteban Cambiasso te, national football team captain Sunil Chhetri leh Indian badminton star Pusarla Venkata Sindhu ten draw hi an buaipui a, MFA honorary secretary leh AIFF league committee deputy chairman Lalnghinglova Hmar pawhin hun pawimawh hi a chhim ve bawk.

Inelna hi October 6, 2017 hian Jawaharlal Nehru Stadium, New Delhi-ah khelh ṭan a ni ang. India chu a thlengtu nih avanga seeded niin Group A-ah dah an ni a, inelna ṭan zan dar 8:00 hian United States an hmachhawn ang.

India hi Group A-ah United States, Colombia leh Ghana te nen an awm ho a, India U17 coach Luis Norton de Matos Benfica chuan group stage paltlang bakah quarterfinal thlen ngei an tum thu a sawi. India team hian coach Nicolai Adam hnuaiah hun rei tak an inpuahchah hnuin player leh coach inkarah buaina a chhuah avangin AIFF chuan kumin March thla-tir khan German coach thlak nan Benfica reserve team coach hlui De Matos hi an lalut a ni.

Inelna kalphung
Inelnaah hian FIFA hnuaia khawmualpui paruk aṭangin team 24 an tel a, heng team-te hi group parukah pali ṭheuha ṭhendarh an ni.

Group khat aṭangin a sang pahnihin last 16 an lut nghal ang a, pathumna zinga che ṭha paliin knockout stage an lut bawk ang.

Brazil leh Spain
Kumin FIFA U17 World Cup hi vawi 17-na tur chiah a ni a, champion ngun ber Nigeria-in nomawi vawi nga an chawi tawh a, Brazil (3), Ghana (2), Mexico (2), Soviet Union (1), Saudi Arabia (1), France (1), leh Swit-zerland (1) ten nomawi an chawi tawh bawk.

Football thiam ram Brazil chu Group D-ah Spain nen dah dun an ni a, North Korea leh Niger awm bawkin ngaihven hlawh a ni ang.

Brazil U17 captain Vinícius Junior chung-changah a club khelhna Flamengo leh Real Madrid ten inremna an ziak tawh a, kum 16 mi lek ni mah se a man zat tur hi pound maktaduai 39.6 bawr vel a ni. Hei hian India ramin a thlen tur inelnaah hian nakin lawka footballer langsar ni mai tur an rawn tel dawn tih a nemnghet a, khawvel pumin a ngaihven ang.

Salt Lake-ah Final
FIFA Under 17 hi khawpui paruk Kolkata (Salt Lake Stadium), Kochi (Jawaharlal Nehru Stadium), New Delhi (JN Stadium), Navi Mumbai (DY Patil Stadium), Guwahati (Indira Gandhi Athletic Stadium) leh Margao (Fatorda Stadium) ah te khelh tur a ni.

Final hi Salt Lake Stadium, Kolkata-ah October 28 hian khelh tur a ni.

Group Ṭhen dan chu
Group A : India, United States, Colombia, Ghana
Group B : Mali, New Zealand, Turkey, Paraguay
Group C : Germany, Iran, Costa Rica, Guinea
Group D : Brazil, Spain, North Korea, Niger
Group E : France, Japan, Honduras, New Caledonia
Group F : Mexico, England, Iraq, Chile