Chennaiyin striker Jeje-a'n a hlawh hnem dawn
Indian Super League club Chennaiyin FC chuan season thar atana an senior player chelh tur pahnih an tichiang - Mizo tlangval Jeje Lalpekhlua leh goalkeeper Karanjit Singh an chelh dawn.
Hnahthial tlangval Jeje hian nimin khan South Indian club-a a cham chhunzawm tur thu hi a tichiang a, kum thum chhung atan contract a ziak. Jeje-a'n season khata a hlawh tur zat hi nuai 140-150 vel a ni a, a contract ziah thar hlut zawng hi nuai 450 bawr vel tihna a ni. Mizo tlangval hi ISL khel zinga hlawh tam ber zinga mi a ni ang.
Chennai club hian Mizo rawlthar Jerry Lalrinzuala an chelh tur thu an tichiang bawk a, Bethlehem Veng rawlthar hi Under 21 player an chelh theih pathum zinga pakhat a ni. Jerry hi Anirudh Thapa nen Chennai club hian an chelh a, U21 player pakhat dang erawh an la tichiang lo.
Chennai duh Jeje
Indian Super League season hmasa ber 2014 aṭangin Chennaiyin-ah Jeje a khel a, season thum chhung South Indian club tan hian khel tawhin ISL-ah club dang a la nei lo. Mizo tlangval hian Chennai club tana a season hmasa ber 2014-ah match 13 khelin goal li a khung a, Indian player goal khung hnem ber a ni.
Kum 2015 ISL-a Chennaiyin an champion ṭumin Jeje a ṭangkai lehzual a, match 11 a inlanah goal ruk khung sakin Colombian striker Stiven Mendoza nena an inkawp chu ISL club tlarhnungte tan mangchhia an ni. MLS lama New York City tana khel ta Mendoza hi Hero of the League-a nih bakah Golden Boot a dawng a, Emerging Player of the League-ah Jeje thlan a ni thung.
Chennaiyin-in nomawi chawi chungin kum 2016-ah ISL hmachhawn mah se Marco Materazzi kaihhruaina hnuaiah beisei an phak lo a, semifinal pawh an thleng zo lo. Italian manager hian player a siksawi reng avangin Jeje-a'n match kua chiah a khel a, goal thum a khung tho.
Beiseina nen Jeje
Jeje-a'n duh se chuan Chennai club sawmna hi hnarin players draft tur zingah a tel thei a, a hlawh a tlem lo ang tih a chiang em em bawk. Mahse, Mizo tlangval hian Chennai club tana khelh chhunzawm zel a thlang a, "Min duh tak taktu club an nih vang a ni," tiin Chennaiyin-a cham chhunzawm a tum chhan hi Vanglaini a hrilh.
Hnahthial tlangval chuan, "ISL ṭantirh aṭangin Chennaiyin-ah hian ka khel tawh a, ka tlangel tawh sa em em. Hetihrual hian fan-ten min ngaina a, tun hnaia Bangalore khawpuia Kyrgyzstan nen Asian Cup qualifier kan khelhah pawh khan min ṭan tur hrim hrimin fans engemaw zat chu Chennai aṭangin an rawn kal a ni," a ti.
Jeje chuan chona phurawm hmachhawn a duh thu sawi nghalin, "Materazzi a chhuak a, coach thar John Gregory kan nei. Coach thar enkawlna hnuaia khel pawh hi a chakawm a, Chennaiyin-a cham zel hi ka thlang ta a ni," tiin Vanglaini a hrilh a, Aston Villa leh QPR boss hlui hmaah a theihna pholan a duh.
Chennaiyin 'risk' Jerry
Bollywood actor lar Abhishek Bachchan-a club Chennaiyin-in senior player pahnih an chelh tur an tihchian bakah U21 aṭanga an chelh theih pathumah pahnih an tichiang a, Jerry bik chelh an duh hi 'risk' lai chu a ni.
ISL danah chuan club-ten U21 player an chelh zingah ram tana inlan tawh an chelh tel chuan player draft hunah fourth round aṭang chauhin an chhim ve thei ang, tih a ni a, ISL club hian Jerry chelha third round player draft-a player lak ve loh mai pawh an duh zawk!
Chennaiyin hi an demawm hran loh. Jerry hian season hman zawh takah ISL-a a season hmasa ber a hmang a, Emerging Player of the League dinhmun a luah nghal thei. I League-ah sawmtu tam tak a nei chungin DSK Shivajians a zawm a, Pune club tan pawh ṭha taka khelin Emerging Player of the League-ah bawk thlan a ni - Chennaiyin hian duh an thlang sual lo.